TÜRKİYƏ RESPUBLİKASININ ƏDALƏT VƏ İNKİŞAF PARTİYASININ SƏDRİ RƏCƏB TAYYİB ƏRDOĞAN BAKIYA SƏFƏRƏ GƏLMİŞDİR
Türkiyə Respublikasının Ədalət və İnkişaf Partiyasının sədri Rəcəb Tayyib Ərdoğan yanvarın 7-də axşam Bakıya səfərə gəlmişdir. Binə hava limanında hörmətli qonağı təyyarənin pilləkəni yanında baş nazirin müavini Abid Şərifov, xarici işlər nazirinin müavini Xələf Xələfov və digər rəsmi şəxslər səmimiyyətlə qarşıladılar. Rəcəb Tayyib Ərdoğanla birlikdə böyük bir heyət də Bakıya gəlmişdir.
Rəcəb Tayyib Ərdoğan Binə hava limanında kütləvi informasiya vasitələri nümayəndələrinin suallarına cavab vermişdir.
SUAL: Ədalət və İnkişaf Partiyası hakimiyyətə gəldikdən sonra Türkiyə Azərbaycanla bağlı yeni siyasət yürüdəcək, yoxsa əvvəlki hökumətin siyasətini davam etdirəcəkdir?
CAVAB: Bizim partiyamız bu günə qədər yürüdülən siyasəti tamamilə dəyişdirmək, bütün türkdilli respublikalarla daha intensiv əlaqələr yaratmaq əzmindədir. Bİz inanırıq ki, bu günə qədərki münasibətlər arzu edilən səviyyədə deyildir. Bunun daha arzu edilən, daha ideal bir səviyyəyə çatdırılması üçün qardaş Azərbaycanla birlikdə əl-ələ, çiyin-çiyinə, yəni iki ayrı dövlət, bir millət anlayışı ilə hərəkət edəcəyik və münasibətlərimizi daha da yaxşılaşdıracağıq. Bu sahədə həm iki ölkənin prezidentləri, həm də hökumət üzvləri əl-ələ verib birlikdə çalışacaqlar. Türkiyənin bir çox ictimai təşkilatlarının və işgüzar dairələrinin nümayəndələri də mənimlə bərabər Azərbaycana gəlmişlər. Biz hamımız münasibətləri daha da inkişaf etdirmək üçün həmrəylik içində olacağıq.
SUAL: Türkiyə ilə Azərbaycan arasındakı iqtisadi münasibətlərin istənilən səviyyədə olduğunu söyləmək mümkündürmü?
CAVAB: Xeyr, arzu edilən səviyyədə deyildir.
SUAL: Qarabağ münaqişəsi ilə bağlı nə demək istərdiniz?
CAVAB: Biz belə hesab edirik ki, Minsk qrupu öz işini davam etdirməlidir. Həmçinin Ermənistan və Azərbaycan arasında prezidentlər səviyyəsində danışıqların davam etdirilməsini də arzulayırıq. Bu müzakirələr davam etməli və müsbət nəticə verməlidir.
SUAL: Amerika Birləşmiş Ştatlarının İraqa müdaxiləsi barədə nə deyərdiniz?
CAVAB: Bu, tamamilə ayrı mövzudur. İnşallah, başqa bir görüşümüzdə ona toxunarıq. Sağ olun.
X x x
Rəcəb Tayyib Ərdoğan və onu müşayiət edən şəxslər maşın karvanının müşayiəti ilə hava limanından şəhərə yollandılar.
Foto Oqtay Aydınoğlunundur
Bölmənin digər xəbərləri
