TÜRKİYƏ SƏFİRİ MƏCBURİ KÖÇKÜNLƏRLƏ GÖRÜŞMÜŞDÜR
Dekabrın 6-da Türkiyənin respublikamızdakı fövqəladə və səlahiyyətli səfiri Əhməd Ünal Çeviköz Ağcabədi və Bərdə rayonlarındakı “Qızıl ay” çadır şəhərciklərində olmuş, məcburi köçkünlərlə görüşmüşdür. Qonağa bu şəhərciklərdə müvəqqəti məskunlaşmış soydaşlarımızın ağır həyat şəraiti barədə ətraflı məlumat verilmişdir.
Səfir bildirmişdir ki, Türkiyə hökuməti qardaş Azərbaycanın haqq işini dəstəkləyir, Ermənistan-Azərbaycan, Dağlıq Qarabağ münaqişəsinin sülh yolu ilə həll olunmasına çalışır. O, Azərbaycan Prezidenti Heydər Əliyevin bu istiqamətdə səmərəli fəaliyyətinin qardaş Türkiyədə yüksək qiymətləndirildiyini bildirmiş, münaqişənin tezliklə həll olunacağına, məcburi köçkünlərin doğma yurdlarına dönəcəklərinə ümidvar olduğunu söyləmişdir.
Məcburi köçkünlər onlarla görüşə gəldiklərinə görə Əhməd Ünal Çeviközə və səfirliyin əməkdaşlarına minnətdarlıqlarını bildirmişlər. Türkiyəli qonaqlar Ramazan bayramı münasibətilə gətirdikləri sovqat bağlamalarını məcburi köçkün ailələrinə paylamışlar.
Bölmənin digər xəbərləri
