Türkiyəli professor: Azərbaycanda seçici, media və dövlət arasında əlaqə düzgün qurulub
Bakı, 24 yanvar, AZƏRTAC
Azərbaycanın həm seçki təcrübəsi, həm də seçki qanunvericiliyi ədalətli və şəffaf seçkilərin keçirilməsinə imkan verir.
Bu fikirləri Secki-2020.az saytına açıqlamasında Türkiyənin Bilkənt Universitetinin professoru Bülent Mehmet Çaplı söyləyib.
Azərbaycanda seçki administrasiyasının medianın seçki prosesini qanun çərçivəsində işıqlandırması üçün bütün tədbirləri gördüyünü diqqətə çatdıran türkiyəli professor deyib: “Bu, çox əhəmiyyətli məsələdir. Çünki seçicilərin qərar verməsi, hansı namizədi dəstəkləməsi üçün ehtiyacı olan məlumatı kütləvi informasiya vasitələri təmin edir. Bu baxımdan, KİV-in azad və şəffaf şəkildə işləyə bilməsi vacibdir. Azərbaycanda dövləti təmsil edən qurumların bu məsələdəki həssaslığı, xüsusilə seçicilər, media və dövlət arasında əlaqənin düzgün qurulması sevindiricidir”.
Apardığı müşahidələrə əsasən fevralın 9-da Milli Məclisə seçkilərin demokratik prinsiplərə uyğun keçiriləcəyini bildirən B.Çaplı deyib: “Əminəm ki, seçicilər öz iradələrini azad şəkildə ifadə edə biləcəklər”.
Bölmənin digər xəbərləri
