TÜRKİYƏNİN XARİCİ İŞLƏR NAZİRİ ERMƏNİSTANLA DANIŞIQLAR APARILMASI BARƏDƏ XƏBƏRLƏRİ ŞƏRH ETMİŞDİR
AZƏRTAC-ın xüsusi müxbiri xəbər verir ki, Türkiyənin xarici işlər naziri Əli Babacan iranlı həmkarı Mənuçehr Mottəki ilə Ankarada keçirdiyi görüşdən sonra jurnalistlərin Ermənistanla danışıqlara başlanılması barədə sualına cavab vermişdir.
Əli Babacan demişdir ki, Türkiyə hələ 1991-ci ildə Ermənistanı bir dövlət kimi tanımışdır və bu çərçivədə Yerevanla vaxtaşırı təmaslar olmuşdur. Bəzi beynəlxalq toplantılarda Ermənistanın sabiq xarici işlər naziri ilə görüşdüyünü söyləyən Əli Babacan əlavə etmişdir ki, iki ölkə arasında aktual problemlər mövcuddur. 1915-ci ildə baş vermiş hadisələrlə bağlı fikir ayrılığı vardır və bu ziddiyyətlərin aradan qaldırılmasında dialoq əsas vasitədir.
Mənuçehr Mottəki isə İran və ABŞ arasında davam edən gərginliklərlə bağlı suala cavab verərkən demişdir ki, son illər Amerikadan İrana gəlmək istəyənlərin sayı artmışdır. Biz xalqlar arasındakı bu əlaqələri dəstəkləyirik. Lakin nazir həssas mövzu olduğunu əsas gətirərək, İranda iş qurmaq istəyən amerikalı biznesmenlərin adlarını açıqlamamışdır.
Bölmənin digər xəbərləri
