Ucarda 12 min 400 hektardan çox sahədə taxıl əkilib
Ucar, 16 noyabr, AZƏRTAC
Ucar rayonunda payızlıq taxıl əkini kampaniyası sürətlə davam edir və artıq 12 min 460 hektarda səpin aparılıb.
Rayon Dövlət Aqrar İnkişaf Mərkəzindən AZƏRTAC-ın bölgə müxbirinə verilən məlumatda bildirilir ki, Ucarda gələn ilin məhsulu üçün 14 min 600 hektardan çox sahədə payızlıq taxıl əkini proqnozlaşdırılır. Artıq kifayət qədər şum çıxarılıb, sahələr əkinə tam hazırlanıb. Hazırda hər gün sahələrə 35-dən çox səpin aqreqatı çıxarılır. Səpin zamanı yerli şərait üçün daha əlverişli olan “Qobustan”, “Ləyaqətli”, “Aran” buğda, “Qarabağ 22”, “İosif” arpa sortlarından istifadə edilir. Toxum xəstəlik və zərərvericilərə qarşı dərmanlanır, səpinlə birlikdə sahələrə gübrə verilir. Rayonun xüsusilə Müsüslü, Yuxarı Şilyan, Qazıqumlaq, Lək və bir sıra digər icra nümayəndəliklərində taxıl əkini daha mütəşəkkil davam edir.
Bölmənin digər xəbərləri
