Ucqar kənd məktəblərində müəllim təminatı ilə bağlı görülən tədbirlər açıqlanıb VİDEO
Bakı, 19 sentyabr, AZƏRTAC
Bəzi ucqar məktəblərdə xüsusilə müəllim təminatından irəli gələn çətinliklər mövcuddur və bu da özünü şagirdlərin nəticələrində göstərir.
Bunu İctimai Televiziyada “Pressinq” verilişinin qonağı olan Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov AZƏRTAC-ın sualına cavabında bildirib.
Onun sözlərinə görə, ayrı-ayrı monitorinq və beynəlxalq qiymətləndirmələrin nəticələrində müəyyən ərazilər və mövzular üzrə zəif nəticələr müşahidə olunur. Belə məktəblərdə müəllim təminatının yaxşılaşdırılması üçün əsas həllərdən biri hibrid təhsil modelinin tətbiqidir. “Bu həllin növbəti illərdə genişlənməsi də təmin olunacaq”, – deyə Eşqi Bağırov vurğulayıb.
Agentlik direktorunun sözlərinə görə, son iki ildə ucqar kənd məktəblərində müəllim təminatının yaxşılaşdırılması istiqamətində əlavə tədbirlər də həyata keçirilib.
O bildirib ki, müəllimlərin işə qəbulu mərkəzləşdirilmiş müsabiqə yolu ilə həyata keçirilir və ucqar kənd məktəblərinə təyin olunan müəllimlərin əməyinin stimullaşdırılması məqsədilə əməkhaqqına əlavələr və kompensasiyalar ödənilir. Həmçinin təyin olunan müəllimlərə ilkin əməkhaqqının iki misli qədər müavinət verilir.
Eşqi Bağırov qeyd edib ki, müəllimlərin işə qəbulu müsabiqəsində vakant yerin mövcud olduğu rayon sakinlərinə də üstünlük verilir. Onun sözlərinə görə, bu yanaşma vakant yerlərin daha dayanıqlı şəkildə tutulmasına və müəllimlərin sonradan həmin yerlərdən imtina etməsi hallarının azalmasına imkan yaradır.
“Üstünlük hüququ olmasa və biz onu bütün namizədlər üçün açıq elan etsək, bəzi hallarda şəhər ərazilərindən həmin məktəbləri seçib ora təyin olunan, sonradan isə vakant yerlərdən imtina edən namizədlərin sayı daha çox olur. Burada üstünlük yerli sakinlərə verildikdə həmin vakant yerlər daha dayanıqlı şəkildə tutulur və imtina hallarının sayı minimuma endirilir”, – deyə o bildirib.
Eşqi Bağırov deyib ki, digər mühüm həll yollarından biri də şagird sayı az olan ucqar kənd məktəblərində müəllimlərin dərs yükünün optimallaşdırılmasıdır.
O qeyd edib ki, şagird kontingentinin az olması səbəbindən belə məktəblərdə ayrı-ayrı fənlər üzrə dərs saatlarının sayı da az olur. Bu səbəbdən bir neçə məktəb üzrə vakant yerlər bir iş yeri kimi müsabiqəyə çıxarılır.
“Məsələn, iki və ya üç məktəbin hər birində kimya fənnindən 6 saat tədris nəzərdə tutulursa, həmin fənn üzrə müsabiqəyə elan etdiyimiz yeri bir iş yeri olaraq təqdim edirik. Ora təyin olunan namizəd əvvəlcədən bunu bilməklə və razılığını ifadə etdikdən sonra üç məktəbdə işləmək hüququ qazanır”, – deyə Eşqi Bağırov bildirib.
Onun sözlərinə görə, bu yanaşma nəticəsində müəllimin dərs yükü optimal şəkildə formalaşdırılır, əməkhaqqı daha rəqabətli olur və eyni zamanda bir neçə məktəbdə müvafiq fənnin tədrisi təmin edilir.
“Düşünürəm ki, bu həllərin nəticəsində həqiqətən bu il ucqar kənd məktəblərində kadr təminatı problemi son 10-20 ilin bəlkə də ən aşağı səviyyəsinə enib. Zənnimcə, növbəti illərdə bu həllərin nəticəsində daha yaxşı səviyyəyə çatacağıq”, – deyə Eşqi Bağırov əlavə edib.
Müxbir Tünzalə Zeyvəliyeva
Bölmənin digər xəbərləri
