Ukrayna ABŞ-dan təqribən 80 ton döyüş sursatı alıb
Kiyev, 15 noyabr, AZƏRTAC
Amerika Birləşmiş Ştatlarından Ukraynaya müdafiə sahəsində yardım kimi təqribən 80 ton döyüş sursatı şəklində növbəti, dördüncü partiyası daxil olub.
AZƏRTAC xəbər verir ki, bu məlumat ABŞ-ın Ukraynadakı səfirliyinin feysbuk səhifəsində dərc edilib.
Məlumatda deyilir: “Bu gün Ukrayna Birləşmiş Ştatlardan 80 min kiloqrama yaxın döyüş sursatı alıb. Bu, Prezident Baydenin Ukraynaya avqust ayında göndərdiyi 60 milyon ABŞ dolları həcmində əlavə yardım çərçivəsində dördüncü partiyadır”.
Səfirlikdən onu da xatırladıblar ki, 2014-cü ildən bəri ABŞ Ukraynaya təhlükəsizlik sahəsində 2,5 milyard dollardan artıq yardım göstərib.
Yardımın bundan əvvəlki iki partiyası Ukraynaya oktyabrın 10-da və 18-də çatdırılıb. Əvvəl razılışadırılmış 250 milyon dollar həcmində yardımdan əlavə Ukrayna amerikalı tərəfdaşlardan daha 60 milyon dollar dəyərində tibbi avadanlıq, zəruri döyüş sursatı, yüksək dəqiqliklə silahlar və radiolokasiya müşahidə vasitələri alır.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
