UKRAYNANIN AZƏRBAYCANA YENİ TƏYİN OLUNMUŞ SƏFİRİ ETİMADNAMƏSİNİN SURƏTİNİ XARİCİ İŞLƏR NAZİRİNƏ TƏQDİM ETMİŞDİR
AZƏRTAC xəbər verir ki, mayın 12-də Ukraynanın Azərbaycana yeni təyin olunmuş səfiri Boris Klimçuk etimadnaməsinin surətini xarici işlər naziri Elmar Məmmədyarova təqdim etmişdir.
XİN-in mətbuat xidmətindən bildirmişlər ki, görüşdə Ukrayna ilə Azərbaycan arasında münasibətlərin kifayət qədər intensiv inkişaf etdiyini vurğulayan tərəflər, cari ildə nəzərdə tutulmuş qarşılıqlı səfərlərin, xüsusilə Azərbaycan Prezidentinin may ayında Ukraynaya, eləcə də Ukrayna rəsmilərinin ölkəmizə səfərlərinin ölkələrimiz arasında əməkdaşlığı daha da dərinləşdirəcəyini bildirmişlər.
Görüşdə, həmçinin may ayında Kiyevdə keçiriləcək enerji sammitinə hazırlıq, Prezident İlham Əliyevin Kiyevə səfəri zamanı imzalanacaq sənədlər, birgə hökumətlərarası komissiyanın 8-ci iclasının gündəliyi, ölkələrarası ticarət dövriyyəsinin artırılması imkanları, GUAM daxilində əməkdaşlıq, birgə enerji layihələri, Xəzər, Qara dəniz və Baltik dənizlərini birləşdirən nəqliyyat dəhlizi layihəsinin perspektivləri və digər məsələlər müzakirə olunmuşdur.
Boris Klimçuk Bakının görməli yerlərindən birində Ukrayna şairi Taras Şevçenkonun xatirəsinə heykəlin ucaldılmasına görə təşəkkürünü bildirmişdir.
Bölmənin digər xəbərləri
