ULU ÖNDƏR HEYDƏR ƏLİYEVİN XATİRƏSİNƏ HƏSR OLUNMUŞ TURNİR KEÇİRİLMİŞDİR

09.05.2006 [12:20]
Çap et
A⁺ A^-

AZƏRTAC xəbər verir ki, Əli Bayramlı şəhərində ulu öndər Heydər Əliyevin xatirəsinə həsr olunmuş karatenin qocyu-ryu növü üzrə ənənəvi respublika turniri keçirilmişdir.

Azərbaycan Qocyu-ryu Okinava Karate-do və Kobu-do növləri Federasiyasının və Əli Bayramlı şəhər gənclər və idman idarəsinin birgə təşkil etdiyi yarışlarda Qəbələ, Əli Bayramlı, Beyləqan, Neftçala, Şəki, Füzuli, Xocavənd, İsmayıllı rayonlarının idmançıları mübarizə aparmışlar.

150-yə yaxın yeniyetmə və gənc karateçinin iştirak etdiyi yarışlarda Əli Bayramlı şəhərinin komandası birinci yer tutaraq, kuboka sahib olmuşdur. Neftçala idmançıları ikinci, Şəki təmsilçiləri üçüncü yerə cıxmışlar.

Yarışların təşkilat komitəsi bu turniri gələcəkdə beynəlxalq səviyyədə keçirməyi planlaşdırır.