“ÜMİD VALSI” ƏBƏDİ MÖVZUDAN BƏHS EDİR
AZƏRTAC xəbər verir ki, iyunun 19-da Azərbaycan Dövlət Akademik Opera və Balet Teatrında dövlət mükafatı laureatı, xalq artisti, “Şöhrət” ordenli bəstəkar, professor Aqşin Əlizadənin musiqisi əsasında səhnələşdirilmiş “Ümid valsı” baletinə ictimai baxış keçrilmişdir.
A.Əlizadə demişdir: “Bu, mənim üçüncü baletimdir. Birinci “Babək” baleti 1986-cı ildə səhnələşdirilmişdir. Aleksandr Dümanın Azərbaycana səfərindən və Natəvanla görüşündən bəhs edən “Qafqaza səyahət” baletinə 2002-ci ildə quruluş verilmişdir. Nəhayət, əbədi mövzuya - məhəbbətə həsr olunmuş üçüncü baletim xatırladır ki, həyatda Hacı Zeynalabdin Tağıyev kimi insanlar yaşamışdır”.
Librettonun əsasını iki sevgilinin tarixçəsi təşkil edir. Hadisələr ötən əsrin əvvələrində, Bakıda, iğtişaşlar, siyasi qarşıdurmalar dövründə baş verir. Sevgililər həyatın kəşməkəşlərinə baxmayaraq məhəbbətlərini qoruyub saxlaya bilirlər. Baletdə böyük mesenat Hacı Zeynalabdin Tağıyevin də obrazı verilmişdir.
“Ümid valsı”nda əsas partiyaları teatrın balet truppasının aparıcı solistləri - “Qızıl dərviş” mükafatı laureatları, əməkdar artistlər Kamilla Hüseynova (Səlminaz) və İslam İslamov (Elmurad), Hacı Zeynalabdin Tağıyevin partiyasını isə truppanın solisti Rüfət Şəfiyev ifa etmişlər. Baletə quruluşu alban xoreoqrafı Pulumb Aqillıu vermişdir.
Baletin premyerası iyulun 21-də olacaqdır.
Bölmənin digər xəbərləri
