“Ümid verən kəlmə” layihəsi çərçivəsində Mərkəzi Qan Bankında tədbir keçirilmişdir
Bakı, 6 dekabr (AZƏRTAC). Azərbaycan Respublikasının Prezidenti yanında Gənclər Fondunun maliyyə dəstəyi ilə Ayxan Paşayevin C kateqoriyası üzrə icra etdiyi fərdi “Ümid verən kəlmə” layihəsi çərçivəsində B.Eyvazov adına Elmi Tədqiqat Hematologiya və Transfuziologiya İnstitutunun Mərkəzi Qan Bankında tədbir keçirilmişdir.
Fondun mətbuat xidmətindən AZƏRTAC-a bildirmişlər ki, irsi qan xəstəlikləri ilə bağlı təlimdən və qanvermə aksiyasından ibarət olan tədbirdə ali və orta ixtisas müəssisələrinin tələbələri iştirak etmişlər.
Tədbirdə məlumat verilmişdir ki, hazırda Azərbaycanda 1000 nəfərdən çox hemofiliyalı, 1300 nəfərə yaxın talassemiyalı xəstə və leykoz xəstəliyindən əziyyət çəkən yüzlərlə insan vardır. Onların qana və qandan hazırlanan dərman preparatlarına, həmçinin mənəvi və psixoloji dəstəyə ehtiyacları gündən-günə artır. Bu xəstələrə müntəzəm olaraq hər 3-4 həftədən bir qandan ayrılan eritrosit kütləsi vurulur. Normal halda eritrositlərin yaşama müddəti 120 gün olduğu halda, talassemiyalı xəstələrin eritrositləri 4-5 gün yaşayır.
Təlimdə gənclərə donor olmağın faydaları, qanvermə əməliyyatının aparılması qaydaları barədə məlumat verilmişdir. Təlimdən dərhal sonra tələbələr müvafiq tibbi müayinədən keçərək qan vermişlər.
Bölmənin digər xəbərləri
