“UNİLEASİNG” LİZİNQ ŞİRKƏTİ 1,8 MİLYON AZN MƏBLƏĞİNDƏ İSTİQRAZLARIN EMİSSİYA PROSPEKTİNİ QEYDİYYATDAN KEÇİRMİŞDİR
“Unileasing” QSC şirkəti lizinq əməliyyatlarının maliyyələşdirilməsi üçün əlavə vəsaitlərin cəlb olunması məqsədi ilə Qiymətli Kağızlar üzrə Dövlət Komitəsində (QKDK) faizli sənədsiz adlı istiqrazların emissiya prospektini qeydiyyatdan keçirmişdir.
Şirkətdən AZƏRTAC-a bildirmişlər ki, emissiyanın həcmi 1 800 000 AZN, bir istiqrazın nominal dəyəri 1000 AZN, istiqrazlar üzrə illik faiz dərəcəsi 14%, tədavül müddəti isə 360 gündür.
Emissiya çərçivəsində şirkət tərəfindən cəlb edilən maliyyə vəsaitləri orta və kiçik biznesin maliyyələşdirilməsinə yönəldiləcəkdir.
“Unileasing” şirkətinin həyata keçirdiyi layihələrin maliyyələşdirilməsi üçün müxtəlif maliyyə vəsaitləri cəlb olunur. Maliyyələşdirmə zamanı əsas rolu şirkətin təsisçiləri - “Unibank” Kommersiya Bankı və Avropanın ən iri bank təsisatı olan Avropa Yenidənqurma və Kommersiya Bankı oynayır. Maliyyə vəsaitləri həmçinin IFC xətti - Beynəlxalq Maliyyə Korporasiyası, “Rayffayzenbank”, ICD xətti - Özəl Sektorun İnkişafı İslam Korporasiyasının və s. xətlər üzrə cəlb edilmişdir.
Bundan başqa, hazırda “Unileasing” lizinq şirkəti müxtəlif maliyyə institutları, xüsusilə də ABŞ və Türkiyənin “Eximbank” bankı, eləcə də Yaponiyanın kommersiya bankları ilə yerli sahibkarların müxtəlif layihələrinin maliyyələşdirilməsi üçün vəsaitlərin cəlb edilməsi üzrə danışıqlar aparır.
