Uqandada məktəbə hücum nəticəsində ölənlərin sayı 41 nəfərə çatıb
Bakı, 17 iyun, AZƏRTAC
Uqandanın qərbində silahlıların orta məktəbə hücumu nəticəsində həlak olanların sayı 41 nəfərə yüksəlib.
AZƏRTAC Reuters agentliyinə istinadla xəbər verir ki, Uqanda Silahlı Qüvvələrinin nümayəndəsi Feliks Kulayiqe orduya məxsus birliklərin ekstremistlərin təqibini davam etdirdiyini deyib. “Qüvvələrimiz girov götürülən insanları azad etmək üçün düşməni təqib edir”, - deyə o, tviter səhifəsində yazıb.
Hüquq-mühafizə orqanları hücumun İŞİD qruplaşması ilə əlaqəli olan “Demokratik qüvvələr alyansı” tərəfindən törədildiyini ehtimal edir.
Uqanda hakimiyyətinə müxalif olan alyans 1995-ci ildən ölkənin qərbində fəaliyyət göstərir. 2003-cü ildə hökumət qoşunlarının zərbələri nəticəsində qruplaşma Konqo Demokratik Respublikasının qərb rayonlarına çəkilib və oradan vaxtaşırı hücuma keçir.
Bölmənin digər xəbərləri
