ÜST: Vaksinasiya birinci və ikinci komponentlərin fərqli peyvənd preparatlarından seçilməsi tövsiyə olunmur
Cenevrə, 9 aprel, AZƏRTAC
Ümumdünya Səhiyyə Təşkilatı (ÜST) koronavirusa qarşı vaksinasiya çərçivəsində birinci və ikinci komponentlərin fərqli peyvənd preparatlarından seçilməsini tövsiyə etməyib.
AZƏRTAC xəbər verir ki, beynəlxalq qurum bu mövqeyi indiyədək toplanan məlumat bazasının hələlik yekun qərar üçün yetərli olmaması ilə əsaslandırıb. Hazırda bəzi istehsalçıların peyvənd dozlarının çatdırılmasında yaranan ləngimə çarpaz vaksinasiya barədə fikirləri meydana gətirib.
Almaniyanın peyvəndlərə icazə üzrə ixtisaslaşan Paul Ehrlix İnstitutuna (PEİ) əsasən, peyvəndlərə icazə verilərkən tədqiqatlar nəticəsində müəyyən edilən təsir gücünə çarpaz vaksinasiyadan sonra zəmanət vermək mümkün deyil. Ona görə də hər iki komponentin eyni istehsalçının peyvəndi əsasında vurulması tövsiyə edilir.
Mütəxəssislər, eyni zamanda, bildiriblər ki, peyvəndin təzələnməsi zamanı (məsələn, növbəti ildə təkrar vaksinasiya) preparatın dəyişdirilməsi heç bir problem yaratmayacaq. Bu zaman hətta vektor və ya mRNA texnologiyaları arasında keçid etmək də mümkündür.
Elgün Niftəli
AZƏRTAC-ın xüsusi müxbiri
Cenevrə
Bölmənin digər xəbərləri
