VAXTANQ KİKABİDZE RUSİYANIN “DOSTLUQ” ORDENİNDƏN İMTİNA ETMİŞDİR
AZƏRTAC İTAR-TASS-a istinadla xəbər verir ki, məşhur gürcü aktyoru və müğənnəsi Vaxtanq Kikabidze bu ilin iyul ayında Rusiya Prezidentinin fərmanı ilə təltif olunduğu “Dostluq” ordenindən imtina etmişdir. Bunu Gürcüstan parlamentinin Təhsil, mədəniyyət və idman komitəsinin sədri Qeorgi Qabaşvili bildirmişdir.
Ölkənin müstəqilliyini dəstəkləmək üçün Gürcüstan parlamentinin binası qarşısında təşkil olunan çoxminli mitinqdə çıxış edən Qabaşvili demişdir: “Kikabidze Rusiyanın Gürcüstana qarşı hərəkətlərinə etiraz əlaməti olaraq, “Dostluq” ordenindən imtina etmək və Rusyada bu ilin payızına nəzərdə tutulmuş konsertlərini ləğv etmək qərarına gəlmişdir”.
Batumidə istirahətdə olan Kikabidze jurnalistlərlə söhbətində bu məlumatı təsdiqləmişdir. O bildirmişdir ki, Rusiya xalqına böyük hörmət və ehtiramla yanaşır, lakin son hadisələrdən sonra ordeni qəbul edə bilməz.
Bölmənin digər xəbərləri
