VƏFA FƏTULLAYEVANIN XATİRƏSİ QEYD OLUNMUŞDUR
Mərasim iştirakçıları, əvvəlcə, aktrisanın yaradıcılığını əks etdirən fotostendlə tanış olmuşlar.
İttifaqın sədri, xalq artisti Azərpaşa Nemətov tədbiri açaraq bildirmişdir ki, Vəfa Fətullayeva 1945-ci ildə sənətkarlar - SSRİ xalq artisti Hökumə Qurbanovanın və görkəmli teatr rəssamı, xalq artisti Nüsrət Fətullayevin ailəsində dünyaya göz açmışdır. Bu səbəbdən onun səhnəyə gəlişini təsadüfi hesab etməyən A.Nemətov görkəmli aktrisanın həyat və yaradıcılığının bəzi məqamlarından danışmış, ömrünün sonunadək Akademik Milli Dram Teatrında çalışdığını, burada rəngarəng obrazlar yaratdığını vurğulamışdır.
Tədbirdə xalq artistləri, aktyorlar Fuad Poladov, Kamal Xudaverdiyev, Rasim Balayev, rejissor Ağakişi Kazımov, teatrşünas, professor, Məryəm Əlizadə və başqaları çıxış etmişlər.
V.Fətullayevanın istər Milli dram teatrının səhnəsində, istərsə də televiziya tamaşalarında yaratdığı parlaq obrazlardan danışan natiqlər onun aktrisa üçün çox vacib olan keyfiyyətlərini - rejissorla işləmək bacarığını, intizamlılığını, rolu özümləşdirmək qabiliyyətini, insan kimi paklığını və sadəliyini xüsusi diqqətə çatdırmışlar.
Mərasimdə aktrisanın ilk və son dəfə çəkildiyi “Firəngiz” televiziya filmində yaratdığı qadın obrazından da bəhs edilmiş, xatirəsinin daim yaşayacağı bildirilmişdir.
Bölmənin digər xəbərləri
