Vergi orqanlarına daxil olan şikayətlərin sayı azalıb
Bakı, 17 fevral, AZƏRTAC
Bu ilin yanvar ayında ümumilikdə vergi orqanlarına 26 min 672 müraciət daxil olub ki, bunun da 94,1 faizi ərizə, 5,8 faizi şikayət, digərləri isə təklif olub.
AZƏRTAC Dövlət Vergi Xidmətinə istinadla xəbər verir ki, müraciətlərin 74,9 faizinin baxılması həmin dövrdə başa çatdırılıb, 25,1 faizi hazırda icradadır.
Baxılan müraciətlərdən 73,1 faizi həll olunub, digərləri barədə qanunvericiliyə müvafiq qaydada qərarlar qəbul edilib. Şikayətlərin faktiki sayı ötən ilin müvafiq dövrü ilə müqayisədə 12,5 faiz azalıb.
Məlumata əsasən, həll olunmuş faktiki şikayətlərin böyük əksəriyyəti kameral vergi yoxlamaları, maliyyə sanksiyasının silinməsi, vergi mükəlləfiyyətləri, vergiödəyicisinin qeydiyyatı, sosial sığorta ödənişləri, vergi borcları və s. məsələlərlə bağlı olub.
Ümumilikdə yanvar ayı ərzində Dövlət Vergi Xidmətinin Aparatında müvafiq vəzifəli şəxslər tərəfindən 34 vətəndaşın qəbulu təşkil edilib. Qəbul zamanı hər bir vətəndaşın müraciətinə fərdi qaydada yanaşılıb, onların qanuni tələblərinin müsbət həlli üçün lazımi tədbirlər görülüb, həlli imkan xaricində olan məsələlərlə bağlı müvafiq izahatlar verilib.
Bölmənin digər xəbərləri
