Vətən müharibəsi qazisi: Ata yurduma qalib Ordunun xilaskar əsgəri kimi gedirəm
Bakı, 6 noyabr, AZƏRTAC
Vətən müharibəsi başa çatandan sonra dörd dəfə doğma Füzuliyə getmişəm. Ata yurdum olan bu diyarın əvvəlki gözəlliyindən indi əsər-əlamət də yoxdur. Erməni vandalları işğalda saxladıqları illər ərzində Qarabağın digər bölgələri kimi Füzulini də xarabazarlığa çeviriblər. İndi şükür ki, digər cəbhə bölgələri kimi onu da tikməyə, qurmağa, abad və yaraşıqlı bir diyara çevirməyə başlayıblar.
Söhbətinə bu sözlərlə başlayan ikinci qrup əlil Tərlan Məmmədov əslən Füzulidən olsa da, Biləsuvarda doğulub. 2019-cu ilin aprelində hərbi xidmətini başa vursa da, müddətdən artıq hərbi qulluqçu kimi xidmətini davam etdirib. Ötən ilin fevralında könüllü olaraq xidmət yerini ön cəbhəyə dəyişib.
Hazırda Bakı Reabilitasiya Mərkəzində müalicə alan Tərlan AZƏRTAC-ın müxbiri ilə söhbətində deyib: “Sentyabrın 27-də səhər Azərbaycan Milli Ordusunun erməni silahlı birləşmələrinin hücumunu dəf etmək üçün keçirdiyi əks-hücum əməliyyatında iştirak etmişəm. Səhər saatlarında Füzulinin Alıxanlı kəndində cəbhə xəttini yararaq 3 postu ermənilərdən təmizlədik. Xeyli yaralanan və şəhidlik qazanan əsgərlərimiz oldu. Bundan iki gün sonra növbəti döyüş tapşırığını yerinə yetirmək üçün Alıxanlı kəndindən Qaraxanbəyliyə getməli idik. Həmin əməliyyat zamanı kəşfiyyat qrupumuz minalanmış səngərdən keçməli oldu. Lap öndə kapitan Fəzail Əliyev, arxasında gizir Nemət Qəhrəmanov, onun ardınca mən, məndən sonra isə leytenant Ayaz Məmmədov gedirdi. Həmin səngərdə minaya düşdüm. Kapitanla gizir məni kürəklərinə alaraq ön xətdən çıxardılar. Əvvəlcə Füzulidə mənə ilkin yardım göstərildi, sonra helikopterlə Silahlı Qüvvələrin Baş Klinik Hospitalına gətirdilər, müalicələrim orada da davam etdirildi, bir müddət isə M.Topçubaşov adına Elmi Cərrahiyyə Mərkəzində müalicə olundum. Məni ən çox təəssüfləndirən odur ki, mənim minaya düşdüyüm günün səhəri Fəzail Əliyev şəhid olub, Nemət Qəhrəmanov isə sonrakı döyüşlərdə yaralanıb, indi birinci qrup əlildir. Özümü ömrümün sonunadək bu iki xilaskarıma borclu hesab edirəm”.
Tərlanın dediyinə görə, kəşfiyyat qrupunda 13 nəfər olublar. Həmin gün yoldaşlarından 4-5 nəfəri minaya düşüb. O, çoxsaylı qəlpə yaraları alıb, ayağının alt toxumaları sıradan çıxıb. Cərrahi əməliyyatla onun ayağının toxumaları qismən bərpa olunsa da, hələ də normal yeriməkdə çətinlik çəkir, uzun məsafə qət edə, normal ayaqqabı geyinə bilmir.
Vətən müharibəsi qazisi söhbətinə davam edərək deyib: “Bir həftədir ki, Bakı Reabilitasiya Mərkəzində bərpa prosesi keçirəm. Müalicələr yaxşı gedir, burada Vətən müharibəsi qaziləri hər cür qayğı ilə əhatə olunublar. Həm fizioterapevtik müalicələr alıram, həm də idman məşğələləri vasitəsilə hərəkətimi bərpa etməyə çalışıram. Sağlamlığımda müəyyən irəliləyişlər var. “YAŞAT” Fondu iki dəfə maddi yardım göstərib. Məşğulluq məsələsinin həllini də diqqətə götürüblər. Normal yeriyəcəyimə ümidim böyükdür. Tam sağalıb ayağa qalxan kimi, bir daha doğma Füzuliyə üz tutub oradakı quruculuq işlərini gözümlə görmək istəyirəm. Dörd dəfə rayonun müəyyən yerlərini gəzib dolaşsam da, minaya düşdüyüm kəndə, oradakı səngərə getməmişəm. Bir arzum da qalib - ordunun əsgəri kimi həmin yerləri ziyarət etmək böyük xoşbəxtlikdir”.
Bölmənin digər xəbərləri
