“Vətəndaş Cəmiyyətində Debat” İctimai Birliyi gənclərin maarifləndirilməsi istiqamətində fəaliyyətini davam etdirir
Bakı, 18 noyabr (AZƏRTAC). “Vətəndaş Cəmiyyətində Debat” İctimai Birliyi Gənclər və İdman Nazirliyinin dəstəyi ilə “Bakı gənclər debat forumu - payız 2013” layihəsini həyata keçirir.
İctimai birlikdən AZƏRTAC-a bildirmişlər ki, layihə çərçivəsində noyabrın 16-17-də Azərbaycan Dövlət İqtisad Universitetində ilk forum keçirilmişdir.
Forumda Azərbaycan bölməsi üzrə 42 komandada 200 gənc iştirak etmişdir. Gənclər müasir dövrdə aktual olan “İKT və təhsil” mövzusu ətrafında debatlar aparmışlar.
Forumun açılış mərasimində Prezident İlham Əliyevin 2013-cü ili “İnformasiya - Kommunikasiya Texnologiyaları ili” elan etməsi, bu sahədə gedən inkişaf və gənclərə göstərilən dövlət dəstəyi qeyd edilmişdir. Bakı şəhərinin təhsil müəssisələrində fəaliyyət göstərən debat klublar və onların fəaliyyəti haqqında danışan “Vətəndaş Cəmiyyətində Debat” İctimai Birliyinin sədri Seymur Hüseynov demişdir: “Bu gün debatlar yalnız Bakıdakı debat klubları vasitəsilə 26 ali təhsil müəssisəsini əhatə edir. Bundan əlavə, 11 regional debat mərkəzi 45-dən artıq inzibati rayonda fəaliyyət göstərir. Gənclər debat vasitəsi ilə natiqlik sənətinə, inandırmaq və təsir göstərmək bacarığına yiyələnir, özlərində tənqidi təfəkkürü inkişaf etdirir, cəmiyyətimiz üçün aktual mövzuları fərqli baxışlardan təhlil edir, bununla da Azərbaycanın gənclər siyasətində fəal iştirak edirlər.”
“Bakı gənclər debat forumu - payız 2013” layihəsi oktyabr - dekabr aylarını əhatə edir və “İKT və təhsil” mövzusunda gənclər arasında silsilə təlim və debatların keçirilməsi, eyni zamanda, 50-yə yaxın müxtəlif səviyyəli tədbirlərin təşkilini nəzərdə tutur.
Bölmənin digər xəbərləri
