Vyanada ABŞ ilə Rusiya arasında nüvə sahəsində silahsızlanmaya dair danışıqlar keçirilə bilər
Vyana, 9 iyun, AZƏRTAC
Vyanada ABŞ ilə Rusiya arasında nüvə sahəsində silahsızlanmaya dair danışıqlar keçirilə bilər.
AZƏRTAC xəbər verir ki, bu barədə məlumatı “Bloomberg” agentliyi yayıb. Məlumatda bildirilir ki, hər iki ölkənin rəsmiləri danışıqların keçirilməsi barədə razılığa gəliblər. ABŞ hökumətinin silahların ləğvinə dair xüsusi nümayəndəsi Marşall Billinqsli iyunda keçiriləcək görüşün yerini və tarixini Rusiya Xarici İşlər Nazirliyinin müavini Sergey Ryabkov ilə dəqiqləşdirdiyini elan edib.
Agentliyin məlumatına görə, görüş iyunun 22-də baş tuta bilər. Görüşə Çin tərəfinin dəvət edildiyi də ehtimal olunur.
Qeyd edək ki, Strateji Nüvə Silahlarının Məhdudlaşdırılmasına dair Müqavilənin müddəti gələn il fevralın 5-də başa çatacaq. Rusiya tərəfi ötən ay yeni mexanizmin işlənib hazırlanmasına qədər mövcud müqavilənin müddətinin daha beş il müddətinə uzatmağı təklif edib.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
