VYANADA AZƏRBAYCAN XALQ CÜMHURİYYƏTİNİN 90 İLLİK YUBİLEYİNƏ HƏSR OLUNMUŞ RƏSMİ QƏBUL KEÇİRİLMİŞDİR
AZƏRTAC-ın xüsusi müxbiri xəbər verir ki, Azərbaycanın Avstriyadakı səfirliyi Vyananın mərkəzi İçərişəhər rayonunda yerləşən “Ferstel” sarayında görkəmli siyasi xadim, müasir Azərbaycan dövlətinin memarı və qurucusu Heydər Əliyevin anadan olmasının 85 illiyinə və Azərbaycan Xalq Cümhuriyyətinin 90 illik yubileyinə həsr olunmuş rəsmi qəbul keçirmişdir.
Qəbulda ATƏT-in baş katibi Mark Perren de Brişambo, Avstriya daxili işlər, xarici işlər, iqtisadiyyat və əmək, ədliyyə nazirliklərinin yüksək rütbəli məmurları, Türkiyə, ABŞ, Rusiya, İtaliya, Almaniya, Norveç, İspaniya, Çin, İran, Orta Asiya və Balkan ölkələrinin səfirləri, Avstriya ictimaiyyətinin nümayəndələri və bu ölkədə yaşayan həmyerlilərimiz iştirak etmişlər.
Azərbaycanın Avstriyadakı səfiri Fuad İsmayılov tədbiri açaraq, iştirakçılara müsəlman Şərqində ilk demokratik dövlət olmuş Azərbaycan Xalq Cümhuriyyətinin yaranma tarixi, mövcud olduğu qısa müddətdə göstərdiyi fəaliyyət, dövlət quruculuğu, ölkənin beynəlxalq aləmdə tanıdılması istiqamətində aparılan işlər barədə danışmışdır. Qeyd edilmişdir ki, Azərbaycan Xalq Cümhuriyyətinin davamçısı olan müasir Azərbaycan Respublikasının müstəqilliyini bərpa etdiyi ilk illər ağır dövr olmuşdur. Ermənistanın hərbi təcavüzü nəticəsində ölkənin ərazilərinin 20 faizi işğal olunmuş və respublikada hər səkkiz vətəndaşın biri qaçqın və məcburi köçkünə çevrilmiş, sosial-iqtisadi böhran dözülməz vəziyyətə gəlib çatmışdı.
Yalnız Heydər Əliyevin hakimiyyətə gəlişindən sonra ölkədə hadisələrin inkişafı tamamilə başqa axar almışdır. Ən qısa zamanda Azərbaycan sosial və iqtisadi problemləri uğurla həll edərək, Xəzər dənizi resurslarını dünya bazarına çıxaracaq strateji enerji layihələrinə start vermiş, ölkədə böyük quruculuq işləri başlanmış və islahatlar keçirilmişdir. Bu gün Azərbaycan dünyanın ən sürətlə inkişaf edən iqtisadiyyata malik bir dövlətinə çevrilmişdir. Bütün bu uğurların altında ulu öndər Heydər Əliyevin imzası durur.
Ümummilli lider Heydər Əliyev siyasi xəttini yeni şəraitdə uğurla davam etdirən Azərbaycan Prezidenti İlham Əliyevin rəhbərliyi altında ölkənin daha sürətlə inkişaf etdiyi və regionun lider dövlətinə çevrildiyi xüsusi vurğulanmışdır.
Səfir bildirmişdir ki, ilk demokratik respublika cəmi iki il ömür sürə bilsə də, müasir müstəqil Azərbaycan dövləti daim yaşayacaqdır.
Tədbirdə “Nəsrin Hobbi və ansambl” musiqi qrupu konsert proqramı ilə çıxış etmişdir. Musiqiçilər Azərbaycanın “Ay laçın”, “Bazarda alma”, “Bu gün ayın üçüdür” xalq mahnılarını, Üzeyir Hacıbəyovun “Leyli və Məcnun” operasından və “Arşın mal alan” operettasından musiqi parçalarını ifa etmişlər.
Bölmənin digər xəbərləri
