VYANADA LİVANDAKI FƏLƏSTİN QAÇQINLARINA YARDIM MƏQSƏDİLƏ DONOR ÖLKƏLƏRİN KONFRANSI KEÇİRİLMİŞDİR
AZƏRTAC-ın xüsusi müxbiri xəbər verir ki, iyunun 23-də Vyanada Avstriya federal xarici işlər naziri Ursula Plasnikin təşəbbüsü ilə Şimali Livan ərazisində yerləşən və 2007-ci ildə Livan ordusu ilə radikal qruplaşmalar arasında gedən döyüşlərdə böyük dağıntılara məruz qalan Nəhr əl-Bared qaçqın düşərgəsinin bərpasına yardım məqsədilə donor ölkələrin konfransı keçirilmişdir.
Livanın Baş naziri Fuad Sinioranın Avstriya xarici siyasət idarəsinin rəhbərinə müraciəti əsasında gerçəkləşən konfransda Fələstin muxtariyyətinin Baş naziri Salam Fayyad, Ərəb Ölkələri Liqasının baş katibi Əmir Musa, Avropa İttifaqının xarici əlaqələr və qonşuluq siyasəti üzrə komissarı Benita Ferrero-Valdner, İordaniya, Yunanıstan, İsveçrə, Lixtenşteynin xarici işlər nazirləri, ümumiyyətlə 70-dən artıq ölkənin nümayəndə heyəti iştirak etmişdir.
Konfransda Avropa İttifaqı adından çıxış edən B.Ferrero-Valdner təmsil etdiyi qurumun 45 milyon avro məbləğində yardım ayıracağını bildirmişdir. Konfrans zamanı müxtəlif ölkə və təşkilatlar qaçqın düşərgəsinin bərpası üçün ümumilikdə 120 milyon dollar (77,3 milyon avro) vəsaitin ayrılması barədə razılığa gəlmişlər. U.Plasnik cari ilin payızında Nəhr əl-Bared düşərgəsində çoxillik bərpa işlərinə start veriləcəyini və 2009-2011-ci illərdə düşərgənin əsaslı şəkildə yenidən qurulacağını söyləmişdir.
Dünya Bankının hesablamalarına görə, 30 mindən artıq insanın məskunlaşdığı qaçqın düşərgəsinin bərpası üçün 250 milyon ABŞ dolları məbləğində vəsait tələb olunur.
Bölmənin digər xəbərləri
