Xaçmazda “Quba-Xaçmaz iqtisadi rayonunun sosial-iqtisadi inkişafı: nailiyyətlər və perspektivlər” mövzusunda tədbir keçirilmişdir
Bakı, 31 iyul (AZƏRTAC). İyulun 31-də Xaçmaz rayonunda “Quba-Xaçmaz iqtisadi rayonunun sosial-iqtisadi inkişafı: nailiyyətlər və perspektivlər” mövzusunda tədbir keçirilmişdir.
Tədbirdə İqtisadi İnkişaf Nazirliyinin (İİN), Azərbaycan Milli Elmlər Akademiyasının, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının, Dünya Bankının, Beynəlxalq Maliyyə Korporasiyasının nümayəndələri və Quba-Xaçmaz iqtisadi rayonunda fəaliyyət göstərən 300-ə yaxın sahibkar iştirak etmişdir.
İİN-in mətbuat xidmətindən AZƏRTAC-a bildirmişlər ki, əvvəlcə tədbir iştirakçıları yeni fəaliyyətə başlamış Quba-Xaçmaz Regional İnkişaf Mərkəzinin sərgi zalında “Quba-Xaçmaz iqtisadi rayonu: uğurlu regional siyasətin nəticələri” mövzusunda sərgi ilə tanış olmuşlar. Sərgidə regionların sosial-iqtisadi inkişafı ilə bağlı dövlət proqramları çərçivəsində Quba-Xaçmaz iqtisadi rayonunda görülmüş işlər və əsas sosial-iqtisadi göstəricilər geniş əks olunmuşdur.
Tədbiri giriş sözü ilə açan iqtisadi inkişaf nazirinin müavini Niyazi Səfərov Prezident İlham Əliyevin regionların inkişafına böyük diqqət və qayğı göstərdiyini vurğulamış, regionların tarazlı inkişafının təmin olunmasında ölkə başçısı tərəfindən təsdiq olunmuş dövlət proqramlarının uğurlu icrasının xüsusi əhəmiyyətini qeyd etmişdir. Bildirilmişdir ki, Quba-Xaçmaz Regional İnkişaf Mərkəzi regionun gələcək iqtisadi inkişafına töhfə verəcək və bu regionun mövcud potensialından səmərəli istifadə etməklə prioritet istiqamətlər üzrə təkliflərin hazırlanmasına və təşviqat işlərinin aparılmasına xidmət edəcəkdir. Mərkəzin fəaliyyət istiqamətlərindən biri gənclərin sahibkarlıq fəaliyyətinə cəlb olunması, biznesini təkmilləşdirmək istəyən kiçik sahibkarlar üçün davamlı maarifləndirmə işlərinin təşkili, konsaltinq və informasiya xidmətlərinin göstərilməsidir.
N.Səfərov bu ilin birinci yarısı üzrə əsas makroiqtisadi göstəricilər barədə də məlumat vermişdir.
Xaçmaz Rayon İcra Hakimiyyətinin başçısı Şəmsəddin Xanbabayev dövlətimizin başçısının diqqət və qayğısı nəticəsində regionların sürətlə inkişaf etdiyini, müasir texnologiyalara əsaslanan yeni müəssisələrin yaradıldığını və məşğulluq səviyyəsinin artdığını vurğulamışdır. Bildirilmişdir ki, Xaçmaz rayonunda quruculuq-abadlıq işləri geniş vüsət almış, yeni istehsal və xidmət müəssisələri, sosial infrastruktur obyektləri açılmış, əhalinin məşğulluq səviyyəsi artmışdır.
AMEA-nın İqtisadiyyat İnstitutunun direktoru İsa Alıyev, İqtisadi İnkişaf Nazirliyinin İqtisadi İslahatlar Elmi-Tədqiqat İnstitutunun direktoru Vilayət Vəliyev ölkənin təbii və əmək potensialından səmərəli istifadə etməklə regionların, eyni zamanda, qeyri-neft sektorunun sürətli inkişafının təmin edilməsi üçün elmi araşdırmaların zəruriliyini qeyd etmiş, bu sahədə həyata keçirilən tədqiqat işləri barədə məlumat vermişlər.
İqtisadi İnkişaf Nazirliyinin əməkdaşları Zaur Qasımov, Bəxtiyar Alışov və Fərrux Dadaşov, Bakı Biznes Tədris Mərkəzinin direktoru Akif Fərruxov “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nda Quba-Xaçmaz iqtisadi rayonu, o cümlədən Xaçmaz rayonu üzrə nəzərdə tutulmuş tədbirlər, sahibkarlara göstərilən elektron xidmətlər, ölkədə istehsal olunan məhsulların yeni bazarlara çıxış imkanları və bu istiqamətdə həyata keçirilən tədbirlər barədə məlumat vermişlər.
Azərbaycan Respublikası Sahibkarlar (İşəgötürənlər) Təşkilatları Milli Konfederasiyası prezidentinin müşaviri Faiq Səmədov ölkənin dinamik iqtisadi inkişafında, dövlət proqramlarından irəli gələn vəzifələrin icrasında sahibkarların yaxından iştirak etdiklərini bildirmiş, Azərbaycanda sahibkarlığın inkişafına böyük diqqət göstərildiyini vurğulamışlar.
Tədbirdə çıxış edən beynəlxalq təşkilatların nümayəndələri Azərbaycanda biznes mühitinin daha da yaxşılaşdırılması, kiçik və orta sahibkarlığın inkişafına göstərilən dəstəyi müsbət qiymətləndirmiş və bu istiqamətlərdə həyata keçirilən tədbirlərin vacibliyini vurğulamışlar.
Tədbir çərçivəsində iki panel iclas keçirilmişdir. Sənaye parklarının yaradılması üzrə panel iclasda ölkədə uğurla həyata keçirilən sənayeləşmə siyasətinə uyğun olaraq yaradılan Sumqayıt Kimya Sənaye Parkının təqdimatı keçirilmiş, sənaye parkında müəssisələrin rezident kimi qeydiyyata alınması və sahibkarlara ediləcək güzəştlər barədə məlumat verilmişdir.
Kiçik sahibkarlığın inkişafı ilə bağlı digər panel iclasda isə sahibkarlığın inkişafı sahəsində görülmüş işlər barədə məlumat verilmiş, kiçik sahibkarlıq fəaliyyəti ilə məşğul olanlar üçün biznes planların hazırlanmasına dair maarifləndirici söhbət aparılmışdır.
Panel iclaslarda sahibkarları maraqlandıran suallar da cavablandırılmışdır.
Tədbirdə çıxış edən sahibkarlar ölkədə özəl bölmənin inkişafına yaradılmış şəraitə, göstərilən diqqət və qayğıya görə Azərbaycan Prezidentinə minnətdarlıqlarını bildirmişlər.
Bölmənin digər xəbərləri
