XALQ RƏSSAMININ 85 İLLİK YUBİLEYİ QEYD OLUNMUŞDUR

05.04.2006 [21:59]
Çap et
A⁺ A^-

AZƏRTAC xəbər verir ki, aprelin 5-də Mədəniyyət və Turizm Nazirliyinin və Azərbaycan Rəssamlar İttifaqının birgə təşkilatçılığı ilə Səttar Bəhlulzadə adına Mərkəzi Sərgi Salonunda milli təsviri sənətimizin yaradıcılarından biri, xalq rəssamı, Dövlət mükafatı laureatı Böyükağa Mirzəzadənin anadan olmasının 85 illiyi ilə əlaqədar onun fərdi sərgisi açılmışdır.

Sərgidə tamaşaçılara yubilyarın təsviri sənətin müxtəlif janrlarında 80-dən çox əsəri təqdim olunur. Onların arasında natürmortlar, tanınmış sənət adamlarının portretləri, əməkçi qadınlarımızın obrazı yaradılmış tablolar diqqəti daha çox cəlb edir.

Mədəniyyət və turizm naziri Əbülfəs Qarayev tədbiri açaraq, milli təsviri sənətimizin Azərbaycanın sərhədlərindən kənarda tanınmasında, əsərləri xarici ölkələrin muzeylərində, şəxsi kolleksiyalarda qiymətli sənət nümunəsi kimi saxlanılan yubilyarın xidmətlərindən ətraflı danışmış, onu əlamətdar gün münasibətilə təbrik etmiş, yaradıcılıq uğurları, cansağlığı arzulamışdır.

Rəssamlar İttifaqının sədri, xalq rəssamı Fərhad Xəlilov, Bakı Musiqi Akademiyasının rektoru, xalq artisti Fərhad Bədəlbəyli və başqaları görkəmli sənətkarın, eyni zamanda, xeyli tamaşaya bədii tərtibat verdiyini, quruluşçu rəssam kimi də fəaliyyət göstərdiyini, rəssam kadrlarının yetişdirilməsində bu gün də yorulmadan çalışdığını qeyd etmişlər.

Axırda B.Mirzəzadə tədbirin təşkilatçılarına və iştirakçılarına minnətdarlığını bildirmişdir.