XARİCİ İŞLƏR NAZİRİ ELMAR MƏMMƏDYAROVUN ABŞ-A İŞGÜZAR SƏFƏRİ BAŞLANMIŞDIR

07.04.2006 [11:55]
Çap et
A⁺ A^-

AZƏRTAC-ın xüsusi müxbiri xəbər verir ki, Azərbaycanın xarici işlər naziri Elmar Məmmədyarov aprelin 6-da ABŞ-a ikigünlük işgüzar səfərə gəlmişdir. Nazir həmin gün Vaşinqtonda ABŞ Helsinki Komissiyasının sədri senator Sem Braunbək, dövlət katibinin sabiq birinci müavini Riçard Armitac, Konqresdə Azərbaycan üzrə işçi qrupunun sədri Solomon Ortis və bu qrupun üzvü konqresmen Silvester Reyeslə görüşlər keçirmişdir. Görüşlərdə ABŞ-Azərbaycan münasibətlərinin hazırkı səviyyəsi və inkişaf perspektivləri, bölgəmizdə vəziyyət, Xəzər hövzəsində enerji təhlükəsizliyi məsələləri, ölkələrimiz arasında iqtisadi əlaqələrin genişləndirilməsi, Azərbaycanla ABŞ Korqresi arasında təmasların artırılması və qarşılıqlı maraq doğuran bir sıra digər mövzular diqqət mərkəzində olmuşdur.

Günün sonunda Azərbaycan xarici işlər nazirinin şərəfinə nahar verilmişdir. Naharda Heritec Fondu, Hadson İnstitutu, Con Hopkins Universitetinin Mərkəzi Asiya və Qafqaz Araşdırmaları İnstitutu kimi nüfuzlu təhlil mərkəzlərinin nümayəndələri, Dövlət Departamentinin və Ağ evin təmsilçiləri, ABŞ-Azərbaycan Ticarət Palatasının üzvləri iştirak etmişlər.

Aprelin 7-də Elmar Məmmədyarov Heritec Fondunda “Azərbaycanın xarici siyasətindəki çağırışlar” mövzusunda məruzə ilə çıxış edəcəkdir. Daha sonra o, dövlət katibi Kondoliza Rays ilə görüşəcəkdir. Elmar Məmmədyarovun ATƏT-in Minsk qrupunun Amerikalı həmsədri Stiven Mənn, dövlət katibinin Avropa və Avrasiya məsələləri üzrə müavini Daniel Frid və ABŞ Prezidentinin Milli Təhlükəsizlik məsələləri üzrə köməkçisi Stiven Hedli ilə də görüşləri nəzərdə tutulmuşdur.

XARİCİ İŞLƏR NAZİRİ ELMAR MƏMMƏDYAROVUN ABŞ-A İŞGÜZAR SƏFƏRİ BAŞLANMIŞDIR

MÜƏLLİFLƏ ƏLAQƏ

Bölmənin digər xəbərləri