XARİCİ İŞLƏR NAZİRLİYİNDƏ GÖRÜŞ
Azərbaycanın xarici işlər naziri Elmar Məmmədyarov yanvarın 26-da Avropa İttifaqının Cənubi Qafqaz üzrə nümayəndəsi Heyki Talvitiyenin başçılıq etdiyi nümayəndə heyəti ilə görüşmüşdür.
Xarici İşlər Nazirliyinin mətbuat mərkəzindən AZƏRTAC-a bildirmişlər ki, nazir E.Məmmədyarov yanvarın 18-19-da Londonda Ermənistanın xarici işlər naziri V.Oskanyanla keçirdiyi görüş barədə məlumat verərək, münaqişənin həlli ilə bağlı dövlətimizin rəsmi mövqeyini və problemin beynəlxalq hüququn norma və prinsipləri əsasında, Azərbaycan Konstitusiyasına uyğun surətdə həllinin vacibliyini qonaqların diqqətinə çatdırmışdır.
Cənab H.Talvitiye münaqişənin həllində və nizama salınmasından sonrakı dövrdə bərpa prosesində Avropa İttifaqının yaxından iştirak etməyə hazır olduğunu vurğulamışdır.
Sonra Ermənistan-Azərbaycan, Dağlıq Qarabağ münaqişəsinin nizama salınmasına yönəlmiş, beynəlxalq vasitəçiliklə aparılan danışıqlarla bağlı geniş fikir mübadiləsi olmuşdur.
Heyki Talvitiye Azərbaycanın Avropa institutlarına inteqrasiyası siyasətinin və bu sahədə münasibətlərin inkişaf etdirilməsinin Avropa İttifaqı tərəfindən dəstəkləndiyini bildirmişdir. Həmin kontekstdə o, Azərbaycanın Avropa Qonşuluq Siyasəti çərçivəsində hazırladığı fəaliyyət planının müzakirəsində Aİ-nin maraqlı olduğunu vurğulamışdır.
Bölmənin digər xəbərləri
