XƏTAİ RAYONUNUN SAKİNLƏRİ BUNDAN SONRA DA ÖLKƏMİZİN İQTİSADİ QÜDRƏTİNİN MÖHKƏMLƏNDİRİLMƏSİNDƏ YAXINDAN İŞTİRAK EDƏCƏKLƏR
AZƏRTAC xəbər verir ki, aprelin 21-də Xətai Rayon İcra Hakimiyyətində cari ilin birinci rübünün yekunları ilə bağlı keçirilən yığıncaqda görülən işlər ətraflı təhlil edilmiş, qarşıda duran vəzifələr müzakirə olunmuşdur.
İdarə, müəssisə, təşkilat rəhbərlərinin, ictimai birliklərin, qeyri-hökumət təşkilatları nümayəndələrinin, iş adamlarının, ziyalıların və ağsaqqalların iştirak etdiyi yığıncaqda icra hakimiyyətinin başçısı Razim Məmmədov bildirmişdir ki, Prezident İlham Əliyevin Azərbaycana rəhbərlik etdiyi dörd ilin hər biri yüksək uğurların əldə edilməsi ilə əlamətdar olmuşdur. Bu dövrdə Azərbaycan dünya birliyinə sürətli inteqrasiya etmiş, mühüm regional və beynəlxalq layihələr həyata keçirilmiş, yüksək iqtisadi tərəqqiyə nail olunmuş və ölkəmiz dünyada söz sahibinə, regionun lider dövlətinə çevrilmişdir.
Sonra məruzə ilə çıxış edən icra hakimiyyəti başçısının birinci müavini Zaməddin Əkbərov bildirmişdir ki, ötən üç ayda rayonda 810 nəfər işlə təmin olunmuşdur. İş yerlərinin 285-i yeni, 340-ı mövcud müəssisə və təşkilatlarda, 35-i fəaliyyəti bərpa edilmiş müəssisələrdə açılmışdır. Bu müddətdə əhaliyə göstərilən pullu xidmətlərin həcmi 146,7 faiz olmuşdur. Pərakəndə əmtəə dövriyyəsi keçən ilin müvafiq dövrünə nisbətən 2,1 dəfə artmışdır. Sənaye müəssisələrində bir nəfərə düşən orta aylıq əmək haqqı 71,2 manat artaraq 336,7 manata çatmışdır. İri tikinti müəssisələri üzrə əsaslı kapitala 42 milyon 326 min manat investisiya yönəldilmişdir ki, bu da ötən ilin müvafiq dövrü ilə müqayisədə 135,2 faiz çoxdur. Tikintidə orta aylıq əmək haqqı 148 manat artaraq, 470,34 manat olmuşdur.
Rayonda aparılan abadlıq və yenidənqurma işləri barədə də geniş bəhs edilmişdir. Məlumat verilmişdir ki, Xocalı soyqırımına həsr olunmuş abidə-kompleksi və Ukrayna meydanı yaxınlığındakı Heydər parkı, Azərbaycanın görkəmli dövlət xadimi Şah İsmayıl Xətainin heykəlinin ətrafı yenidən qurulmuş, Yusif Səfərov küçəsində park salınmışdır.
Məruzəçi sahibkarlığın inkişafı, məşğulluq probleminin həlli, təhsil, səhiyyə və mədəniyyət, gənclərlə iş sahəsində həyata keçirilən tədbirlər, vətəndaşların qəbulu, ərizə və şikayətlərə baxılması, rayonda aparılan abadlıq və quruculuq işləri, əhalinin su, təbii qaz və elektrik enerjisi ilə təchizatının yaxşılaşdırılması, əlillərin, şəhid ailələrinin, qaçqın və məcburi köçkünlərin sosial müdafiəsi istiqamətində atılmış addımlardan da danışmışdır.
Natiqlər dövlətimizin başçısını əmin etmişlər ki, rayonun sənaye müəssisələrinin, tikinti, xidmət təşkilatlarının və digər sahələrinin kollektivləri qazanılmış uğurların daha da artırılması və ölkəmizin iqtisadi qüdrətinin gündən-günə möhkəmləndirilməsi üçün bütün imkanları səfərbər edəcəklər.
Çıxışlarda xüsusi vurğulanmışdır ki, xalqımız, o cümlədən Xətai rayonunun sakinləri öz Prezidentinə inanır, ölkəmizin başçısının gördüyü işləri, atdığı bütün addımları dəstəkləyir, onun rəhbərliyi altında Azərbaycanın gələcəyinə ümidlə baxır və bu il keçiriləcək prezident seçkilərində öz layiqli namizədini - İlham Əliyevi dəstəkləyərək, hamılıqla ona səs verəcəklər.
Hesabat yığıncağında çıxış edən Prezidentin İcra Aparatının Regional idarəetmə və yerli özünüidarəetmə orqanları ilə iş şöbəsinin əməkdaşı Tağı Tağıyev ümummilli liderimiz Heydər Əliyevin uzaqgörən iqtisadi strategiyasının Prezident İlham Əliyev tərəfindən uğurla davam etdirildiyini, Azərbaycan iqtisadiyyatının dinamik, rekord sürətlə inkişafının səngimədiyini vurğulamışdır.
Bölmənin digər xəbərləri
