“Xəzər dənizinin hidrometeorologiyası” kitabı nəşr olunmuşdur
Bakı, 24 dekabr (AZƏRTAC). Akademik Həsən Əliyev adına Azərbaycan Milli Elmlər Akademiyasının Coğrafiya İnstitutunun direktor əvəzi, AMEA-nın müxbir üzvü Ramiz Məmmədovun “Xəzər dənizinin hidrometeorologiyası” kitabı çapdan çıxmışdır.
İnstitutdan AZƏRTAC-a bildirmişlər ki, kitab Xəzər dənizinin hidrometerologiyası və səviyyə problemi sahəsində işləyən mütəxəssislər, doktorantlar və tələbələr üçün nəzərdə tutulmuşdur.
Nəşrin ümumi hissəsində Xəzər dənizinin etimologiyası və formalaşması, müasir fiziki parametrləri və coğrafi səciyyəsi, mühafizə olunan əraziləri haqqında ətraflı informasiya verilir. Bu bölmədə dənizin karbohidrogen ehtiyatları və bioloji resursları da araşdırılır. İkinci fəsildə sahillərin və dəniz dibinin geomorfologiyasından, üçüncü fəsildə isə dəniz üzərində iqlim şəraitinin formalaşmasından və meteoroloji dəyişkənlikdən bəhs olunur.
Kitabda dənizin hidrologiyasına böyük yer verilir. Dördüncü fəsil bu mövzuya həsr olunmuşdur. Fəsildə dənizin axınları, temperaturu, duzluluğu, şəffaflığı və s. hidroloji parametrlərin mövsüm dəyişmələrini əks etdirən yeni xəritələr verilmişdir.
Xəzər dənizinin səviyyəsinin dəyişməsi və onun sosial-iqtisadi, ekoloji nəticələri, səviyyə dəyişməsinin uzunmüddətli proqnozu beşinci fəsildə diqqətlə araşdırılır. Sonuncu altıncı fəsil dənizin ekocoğrafiyasına, çirklənmə mənbələrinin müəyyənləşdirilməsinə, ümumi ekoloji vəziyyətinin qiymətləndirilməsinə həsr olunmuşdur.
Bölmənin digər xəbərləri
