Xəzəryanı ölkələrin balıqçılıq təsərrüfatı nazirliklərinin və komitələrinin nümayəndələri Bakıda toplaşmışlar
Bakı, 24 aprel (AZƏRTAC). Aprelin 24-də Bakı şəhərində Xəzər dənizinin Su Bioresursları Komissiyasının 33-cü iclası öz işinə başlamışdır.
AZƏRTAC xəbər verir ki, Xəzəryanı ölkələrin balıqçılıq təsərrüfatı nazirliklərinin və komitələrinin nümayəndə heyətinin iştirak etdikləri iclas Azərbaycan tərəfinin sədrliyi ilə keçmişdir.
İclası giriş sözü ilə açan Azərbaycan Respublikası ekologiya və təbii sərvətlər nazirinin müavini Rauf Hacıyev gündəlikdə duran məsələlər barədə məlumat vermişdir. Bildirmişdir ki, iclasın davam edəcəyi iki gün ərzində balıq ovu kvotasının mənimsənilməsi, süni balıqartırma və balıq ehtiyatlarının mühafizəsi üzrə 2011-2012-ci illərdə görülən işlər barədə məlumat veriləcək, dəniz ekspedisiyalarının və elmi-tədqiqat işlərinin nəticələrinə əsasən balıq ehtiyatlarının müasir vəziyyəti barədə hesabatlar təqdim olunacaq, o cümlədən 2013-cü il üçün Xəzər dənizində su bioresurslarının ümumi ovunun həddi və onun milli kvotalara bölünməsi məsələsinə baxılacaqdır. İclasda, həmçinin nərəcinsli balıqların sənaye ovuna qadağa qoyulması məsələsinə də aydınlıq gətiriləcəkdir.
Nazir müavini diqqətə çatdırmışdır ki, 2010-cu il noyabrın 18-də Xəzərətrafı dövlətlərin başçılarının Bakı şəhərində keçirilmiş Sammitində Qazaxıstan Respublikası Prezidentinin irəli sürdüyü nərəcinsli balıqların sənaye ovuna qadağa qoyulması təklifi prezidentlər tərəfindən bəyənilmişdir. Bu təklifi həyata keçirmək məqsədilə Rusiya Federasiyası tərəfindən təklif edilmiş “Xəzər dənizində nərəcinsli balıqların ehtiyatlarının qorunması barədə” Saziş layihəsi müzakirəyə çıxarılacaqdır. Bundan əlavə, Türkmənistan Respublikası tərəfindən irəli sürülmüş “Xəzər dənizinin su bioresurslarının qorunması və ehtiyatlarından səmərəli istifadə edilməsi barədə” Saziş layihəsi də müzakirə olunacaqdır.
Xəzər dənizində bioloji resursların vəziyyəti ilə bağlı məlumat verən R.Hacıyev diqqətə çatdırmışdır ki, bütün Xəzəryanı ölkələrdə hər il balıqların ehtiyatlarını öyrənmək və qorumaq üçün mühafizə işləri aparılır. Azərbaycanda da hüquq mühafizə orqanları, təbiəti mühafizə təşkilatları tərəfindən brakonyerlərə qarşı mübarizə aparılır. Görülən işlərə baxmayaraq Xəzəryanı ölkələrdə brakonyerliyin qarşısını tamamilə almaq hələ də mümkün olmamışdır. Nəticədə törədici balıqların sayında azalma müşahidə olunur. Buna görə də nərəartırma zavodları üçün kifayət qədər törədici balıq toplamaq mümkün deyildir.
Nərəcinsli balıqların azalmasının bir səbəbini də dənizin çirklənməsi ilə bağlayan nazir müavini demişdir: “Bundan əlavə, Xəzər dənizinə Qara dənizdən mioksis adlanan meduza düşmüşdür. Bu amil də kilkə balıqların azalmasına səbəb olmuşdur. Kilkə balıqlar isə siyənəklərin və nərəkimilərin çoxaldılmasında yem kimi istifadə olunur”.
İclasda İranın “Şilat” balıqçılıq və liman şöbəsinin rəhbəri Əli Əsgər Mücdəhidi çıxış edərək qarşıya çıxan problemlərin həlli üçün Xəzəryanı ölkələrin əməkdaşlığının vacibliyini bildirmişdir. Demişdir ki, İran nəsli kəsilən balıqların bərpa olunması ilə bağlı səylərini artırır.
Qazaxıstanın Balıq Təsərrüfatı Komitəsi sədrinin müavini Nariman Junusov isə bildirmişdir ki, onun ölkəsində artıq nərə balıqlarının sənaye məqsədilə ovuna qadağalar qoyulmuşdur.
Rusiya və Türkmənistanın nümayəndələri də Xəzərin bioloji resursları ilə bağlı hazırkı vəziyyətdən narahatlıqlarını bildirmiş və bu sahədə birgə səylərin vacibliyini qeyd etmişlər.
Xəzəryanı ölkələrin nümayəndələri çıxışlarında iclasın yüksək səviyyədə keçirilməsinə yaradılan şəraitə görə Azərbaycan hökumətinə minnətdarlıqlarını bildirmişlər.
Sonra iclas müzakirələrlə davam etmişdir.
Bölmənin digər xəbərləri
