SİYASƏT
XİN-İN MƏTBUAT MƏRKƏZİ XƏBƏR VERİR
Azərbaycanın xarici işlər naziri Vilayət Quliyev səfər proqramının Nyu-York hissəsi başa çatdıqdan sonra sentyabrın 18-də Vaşinqtona gəlmişdir.
Sentyabrın 19-da o, senator Sem Braunbəklə (respublikaçı, Kanzas ştatı) görüşmüşdür. Cənab Braunbək ikitərəfli Amerika-Azərbaycan münasibətlərinin uğurla inkişaf etməsini, Bakı-Tbilisi-Ceyhan əsas ixrac boru kəməri tikintisinin təməlinin qoyulmasını yüksək qiymətləndirmiş, ölkəmizin terrorizmlə beynəlxalq mübarizə kampaniyasında iştirakı barədə xüsusilə müsbət fikirdə olduğunu söyləmişdir.
V.Quliyev senatorun suallarına cavab verərək, onu ölkəmizdə və regionda vəziyyətin inkişafı, Ermənistan-Azərbaycan münaqişəsinin həllinin gedişi barədə məlumatlandırmışdır.
Görüşdə 907-ci maddənin qüvvəsinin dayandırılmasının ikitərəfli münasibətlərin inkişafına müsbət təsir göstərdiyi razılıqla qeyd olunmuş, həmin maddənin tamamilə aradan götürülməsi məsələsində mövqelərinin uyğunluğu vurğulanmış, habelə təhsil sahəsi də daxil olmaqla, əməkdaşlıq məsələləri barədə fikir mübadiləsi aparılmışdır.
V.Quliyev konqresmen Co Pitts ilə görüşdə Azərbaycan-Amerika əməkdaşlığının inkişafı, Bakı-Tbilisi-Ceyhan əsas ixrac boru kəməri tikintisinin təməlinin qoyulması mərasimi barədə ətraflı məlumat vermişdir. Söhbət zamanı Ermənistan-Azərbaycan, Dağlıq Qarabağ münaqişəsinin nizama salınmasının gedişinə və terrorizmlə mübarizə kampaniyası çərçivəsində ABŞ-Azərbaycan əməkdaşlığının inkişafına xüsusi diqqət yetirilmişdir. Görüşdə Konqresin “ipək yolu” işçi qrupunun fəaliyyəti də müzakirə edilmişdir. Xatırladaq ki, Nümayəndələr palatasında bu qrupun sədri C.Pittsdir.
Senator S.Braunbək və konqresmen C.Pitts münasib bildikləri vaxtda ölkəmizə səfərə dəvət olunmuşlar. Onlar bu dəvəti minnətdarlıqla qəbul etmişlər.
Dövlət katibinin birinci müavini Riçard Armitac ilə görüşdə Amerika diplomatı Bakı-Tbilisi-Ceyhan boru kəməri tikintisinə başlanması münasibətilə V.Quliyevi təbrik etmiş, ölkələrimiz arasındakı əməkdaşlıq münasibətlərini, ümumən, yüksək qiymətləndirmişdir.
Tərəflər regiondakı vəziyyəti, Ermənistan-Azərbaycan münaqişəsinin sülh yolu ilə həlli prosesini və perspektivlərini, Əfqanıstandakı vəziyyəti və buradakı beynəlxalq kontingentin fəaliyyətini müzakirə etmişlər.
907-ci maddənin tamamilə aradan götürülməsinin perspektivlərinə xüsusi diqqət yetirilmişdir. GUÖAM-ın inkişafı, bu quruma daxil olan dövlətlərin gələcəkdə qarşılıqlı fəaliyyəti və təşkilatın Birləşmiş Ştatlar ilə əməkdaşlığı məsələsi barədə də ətraflı söhbət getmişdir.
Müdafiə nazirinin müavini Daqlas Fayt ilə görüş ötən ilin 11 sentyabr hadisələrindən sonra yaranmış şəraitdə ölkələrimiz arasında hərbi sahədə və təhlükəsizlik sahəsində əməkdaşlıq, o cümlədən antiterror koalisiyası çərçivəsində qarşılıqlı fəaliyyət məsələlərinin müzakirəsinə həsr olunmuşdur.
Tərəflər regiondakı vəziyyəti, 907-ci maddənin tamamilə aradan götürülməsinin perspektivlərini və həmin maddənin ləğv edilməsinin qarşılıqlı əməkdaşlığa müsbət təsir göstərəcəyini də müzakirə etmişlər.
Həmin gün V.Quliyev Azərbaycan Ticarət və Mədəniyyət Mərkəzində Maske adına proqram çərçivəsində ABŞ-da təhsil alan azərbaycanlı tələbələrdən bir qrupu ilə görüşərək, ölkəmizin xarici siyasət məsələləri və, ümumən, beynəlxalq vəziyyəti barədə söhbət aparmışdır.
Sentyabrın 20-də V.Quliyev ABŞ Prezidentinin milli təhlükəsizlik üzrə müşavirinin müavini Stiven Hedli ilə görüşmüşdür. Söhbət zamanı 2001-ci il 11 sentyabr faciəsindən sonra ötən dövr ərzində qarşılıqlı əlaqələrin inkişafı, regionda vəziyyət, Azərbaycanın islahatlar yolu ilə irəliləməsi, Ermənistan-Azərbaycan, Dağlıq Qarabağ münaqişəsinin nizama salınmasının gedişi müzakirə olunmuşdur.
Görüşlərdə qarşılıqlı maraq doğuran bir sıra digər məsələlər barədə də fikir mübadiləsi aparılmışdır.
Həmin gün nazir Yel Universitetinin təşkil etdiyi “İpək yolu XX1 əsrdə” mövzusunda konfransda iştirak etmək üçün Nyu-Heven şəhərinə (Konnektikut ştatı) yola düşmüşdür.