Xocalı qətliamı XX əsrdə törədilmiş ən dəhşətli faciədir
Bakı, 25 fevral (AZƏRTAC, Əsəd Məmmədov). Fevralın 25-də Nərimanov Rayon İcra Hakimiyyətində Xocalı soyqırımının 22-ci ildönümü ilə bağlı anım mərasimi keçirilmişdir.
AZƏRTAC xəbər verir ki, əvvəlcə Xocalı soyqırımı qurbanlarının xatirəsi bir dəqiqəlik sükutla anılmışdır.
Mərasimdə rayon icra hakimiyyətinin rəhbərliyi, idarə, müəssisə və təşkilat rəhbərləri, ictimaiyyətin, qeyri-hökumət təşkilatlarının nümayəndələri, Nərimanovda məskunlaşmış Xocalıdan olan məcburi köçkün və şəhid ailələri, faciə zamanı hər iki valideynini itirmiş gənclər iştirak etmişlər.
Nərimanov Rayon İcra Hakimiyyətinin başçısı Abdin Fərzəliyev çıxış edərək demişdir ki, Xocalı qırğını XX əsrdə bəşəriyyətə qarşı törədilmiş ən dəhşətli faciədir. O, erməni silahlı qüvvələri tərəfindən xalqımıza qarşı törədilmiş bu cinayətin ağır nəticələrindən danışmış, dinc əhalinin xüsusi qəddarlıqla qətlə yetirilməsi, əsir götürülən insanların isə dəhşətli işgəncələrə, zülm və təhqirlərə məruz qaldıqlarını bildirmişdir.
A.Fərzəliyev Xocalı hadisələri ilə bağlı həqiqətlərin dünya ictimaiyyətinə çatdırılması, beynəlxalq miqyasda bu faciənin xalqımıza qarşı soyqırımı aktı kimi tanınması üçün dövlətimizin bütün zəruri addımları atdığını qeyd etmişdir. O, haqq səsimizin bütün dünyada eşidilməsi üçün hər bir azərbaycanlının fəallıq göstərməsinin önəmini vurğulamış, həmvətənlərimizin bu istiqamətdə səfərbər olmasının, torpaqlarımızın azad edilməsində Prezident İlham Əliyevin ətrafında daha sıx birləşməyimizin vacibliyini diqqətə çatdırmışdır.
Milli Məclisin deputatı Adil Əliyev bildirmişdir ki, Azərbaycan xalqının qan yaddaşında silinməz izlər buraxmış Xocalı faciəsi tarix boyu erməni qəsbkarları tərəfindən xalqımızın başına gətirilmiş soyqırımı aktlarından biridir.
Qeyd edilmişdir ki, Ermənistanın Xocalıda sovet qoşunlarının köməyi ilə həyata keçirdiyi insanlıq əleyhinə bu cinayətin beynəlxalq miqyasda ifşası istiqamətində xeyli iş görülmüş, xarici dillərdə kitablar, sənədlər dərc olunmuş, bir çox internet saytları yaradılmışdır. Azərbaycanın birinci xanımı, Heydər Əliyev Fondunun prezidenti Mehriban Əliyeva, Fondun vitse-prezidenti Leyla Əliyeva Xocalı faciəsi ilə bağlı həqiqətlərin dünya ictimaiyyətinə çatdırılması istiqamətində ardıcıl və məqsədyönlü fəaliyyət göstərirlər.
Xocalılı şəhid ailəsi Brilliyant Hacıyeva şəhərdə erməni vandalları tərəfindən törədilmiş qətliamın canlı şahidi olduğunu bildirmiş və bunu tarixdə ən dəhşətli faciə kimi dəyərləndirmişdir. B.Hacıyeva bütün qaçqın və məcburi köçkünlərin, şəhid ailələrinin, müharibə əlillərinin, o cümlədən Xocalı sakinlərinin ötən müddətdə hərtərəfli dövlət qayğısı ilə əhatə olunduqlarını vurğulamışdır.
Anım mərasimi rayonun bir qrup gənc tələbəsi tərəfindən hazırlanmış, Xocalı soyqırımının dəhşətlərini əks etdirən ədəbi-bədii kompozisiya ilə davam etmişdir.
Sonda Nərimanov Rayon İcra Hakimiyyəti tərəfindən Xocalıdan olan şəhid ailələrinə və faciə zamanı hər iki valideynini itirmiş 25 gəncə birdəfəlik maddi yardımlar göstərilmişdir.
Bölmənin digər xəbərləri
