XOCALI RAYON İCRA HAKİMİYYƏTİNİN BAŞÇISI ŞAHMAR USUBOVUN ÇIXIŞI
-Möhtərəm cənab Prezident!
Xalqımızın ümummilli lideri, müasir Azərbaycan dövlətinin memarı və qurucusu Heydər Əliyevin müvafiq Sərəncamı ilə Dövlət Neft Fondundan ayrılan ilk vəsait hesabına Goranboy rayonunun Aşağı Ağcakənd qəsəbəsində salınmış və ulu öndərimizlə birlikdə Sizin də iştirak etdiyiniz şəhərciyin açılış mərasimi xocalıların xatirində əbədi həkk olunmuşdur.
Xocalı rayonundan olan məcburi köçkünlər respublikanın 50 şəhər və rayonunda müvəqqəti məskunlaşmışlar. Onlardan olduqca dözülməz şəraitdə yaşayan 149 ailə - 736 nəfər məcburi köçkün də öz doğma yurdlarına yaxın ərazidə - həmin qəsəbədə yeni evlərlə təmin edilmişlər. Bakı şəhərində yerləşən rayon icra hakimiyyəti, digər idarəetmə orqanları, rayonun bütün idarə, müəssisə və təşkilatları da ulu öndərimizin müvafiq göstərişi ilə bu qəsəbədə yerləşdirilmişdir. Bu, bir daha onu göstərir ki, xalqımızın ümummilli liderinin məcburi köçkünlərin bütün sosial problemlərinə gündəlik diqqət və qayğı siyasəti bu gün Sizin tərəfinizdən də ölkənin prioritet problemi kimi diqqət mərkəzində saxlanılır. Bu diqqət və qayğıya görə, cənab Prezident, bütün xocalılıların dərin minnətdarlığını Sizə çatdırıram.
Respublikamızın iqtisadi qüdrəti ilbəil yüksəlir, əhalinin, o cümlədən məcburi köçkünlərin maddi rifahı yaxşılaşır, regionda irimiqyaslı layihələrin həyata keçirilməsi sayəsində Azərbaycanın siması gündən-günə dəyişir, hər yerdə böyük abadlıq və quruculuq işləri aparılır, yeni iş yerlərinin yaradılması hesabına işsizlik və yoxsulluq problemi tədricən aradan qaldırılır.
Azərbaycandakı iqtisadi yüksəliş Ermənistanın hərbi təcavüzü nəticəsində öz yurdlarından didərgin düşmüş soydaşlarımızın da sosial problemlərinin həllinə, onların maddi vəziyyətinin yaxşılaşmasına öz müsbət təsirini göstərir. Belə ki, məcburi köçkünlərə dövlət büdcəsindən ayrılan vəsaitlərin, pensiya və müavinətlərin, eyni zamanda, əmək haqqının yüksəldilməsi, şəhid ailələrinə 100 manat məbləğində müavinətin, aztəminatlı ailələrə aylıq müavinətlərin verilməsi yuxarıda qeyd olunanların əyani göstəricisidir.
Sizin tapşırığınız əsasında çadır düşərgələri artıq ləğv edilərək məcburi köçkünlər müasir tələblərə cavab verən yeni qəsəbələrə köçürülür, onların müvəqqəti məskunlaşdığı bir çox obyektlərdə təmir işləri aparılır, həmin ailələrin mənzil-məişət şəraitinin yaxşılaşdırılması istiqamətində mühüm işlər görülür.
Son dörd ildə Aşağı Ağcakənd qəsəbəsində rayon icra hakimiyyəti, rayon prokurorluğu, rayon polis şöbəsi üçün inzibati binalar, 25 çarpayılıq xəstəxana tikilərək istifadəyə verilmiş, rayon məhkəməsinin, statistika idarəsinin, rayon dövlət yanğından mühafizə hissəsinin yerləşdiyi binalar təmir olunmuş, qəsəbəyə 14 kilometr məsafədən içməli su xətti çəkilmiş, həyətyanı sahələrin suvarılması üçün nasosxana tikilmişdir.
Eyni zamanda, 2005-ci ilin iyun ayında Sizin yanınızda keçirilən müşavirədəki tapşırığınıza əsasən ərazidə məskunlaşmış məcburi köçkünlərə ayrılmış torpaq sahəsindən təyinatı üzrə səmərəli istifadənin təmin edilməsi məqsədi ilə “Aqrolizinq” ASC-nin Xocalı rayon filialı yaradılmış, həmin filial 10 ədəd müxtəlif kənd təsərrüfatı texnikası ilə təmin edilmişdir. Bakı, Gəncə və Naftalan şəhərlərində məcburi köçkünlərimizin müvəqqəti məskunlaşdıqları ictimai binaların xeyli hissəsində təmir işləri aparılmış, sıradan çıxmış elektrik avadanlıqları, su nasosları və s. yeniləri ilə əvəz olunmuşdur. Bundan başqa, rayon əhalisinin məskunlaşdığı yerlərdə 3 subartezian quyusu qazılmışdır. Dövlət Proqramına uyğun olaraq Goranboy rayonu ərazisində Xocalı rayonundan olan 500 məcburi köçkün ailəsi üçün evlərin inşası məqsədi ilə ayrılmış torpaq sahəsində yaxın vaxtlarda tikinti işlərinə başlanacaqdır.
Möhtərəm cənab Prezident!
Sizin diqqətinizə həlli vacib olan bir neçə məsələni də çatdırmaq istəyirəm.
Goranboy-Yuxarı Ağcakənd avtomobil yolunun əsaslı təmirinə, Aşağı Ağcakənd və ətraf yaşayış məntəqələrinə qaz xəttinin çəkilişinə, ərazidə məskunlaşmış əhalinin işsizlik probleminin aradan qaldırılması məqsədi ilə İqtisadi İnkişaf Nazirliyi tərəfindən kiçik emal və istehsal sahələrinin yaradılmasına, ərazinin münasib iqlim şəraitini nəzərə alaraq, üzümçülüyün və kartofçuluğun bərpa edilməsinə böyük zərurət vardır.
Möhtərəm cənab Prezident!
Ermənistanın hərbi təcavüzünə, soyqırımına məruz qalmış və əhalisinin say nisbətinə görə ən çox şəhid vermiş Xocalı rayonunun ictimaiyyəti Heydər Əliyev kursuna həmişə sadiqliyini nümayiş etdirərək, Sizin apardığınız uğurlu siyasəti ürəkdən bəyənir və müdafiə edir. Sizi əmin edirik ki, xocalılılar dövlətimizə və Sizə sədaqətli olduqlarını öz əməli işləri ilə bundan sonra da sübut edəcəklər.
Diqqətinizə görə sağ olun.
Bölmənin digər xəbərləri
