Xocalı soyqırımı XX əsrin ən dəhşətli və qəddar terror aktlarından biridir
Bakı, 27 fevral (AZƏRTAC). Azərbaycan Milli Elmlər Akademiyasının (AMEA) Yusif Məmmədəliyev adına Neft-Kimya Prosesləri İnstitutunda Xocalı soyqırımı qurbanlarının xatirəsini anma tədbiri keçirilmişdir.
Əvvəlcə institutun əməkdaşları Xocalı soyqırımı qurbanlarının xatirəsinə ucaldılmış “Ana harayı” abidəsini ziyarət etmişlər.
İnstitutdan AZƏRTAC-a bildirmişlər ki, tədbirdə çıxış edən institutun direktor müavini, texnika üzrə elmlər doktoru Hikmət İbrahimov Xocalı soyqırımının dünyada tanıdılması istiqamətində sistemli və ardıcıl işlərin aparılmasının məhz ulu öndər Heydər Əliyevin 1993-cü ildə ikinci dəfə hakimiyyətə qayıdışından sonra mümkün olduğunu demişdir.
Bildirilmişdir ki, Xocalı həqiqətlərinin dünyaya tanıdılması, Ermənistanın keçmiş sovet hərbi dairələrinin dəstəyi ilə həyata keçirdiyi insanlıq əleyhinə cinayətin beynəlxalq miqyasda ifşası istiqamətində xeyli işlər görülmüş, xarici dillərdə kitab və sənədlər nəşr olunmuşdur.
Tədbirdə çıxış edən institutun Gənc Alim və Mütəxəssislər Şurasının üzvləri Rəna Əsədova, Fəxriyyə Abdullayeva və Asəf Babazadə bu faciənin XX əsrin ən dəhşətli və qəddar hadisələrindən biri olduğunu bildirmişlər.
Sonda Xocalı soyqırımını əks etdirən videoçarx nümayiş etdirilmişdir.
Bölmənin digər xəbərləri
