XOCALI SOYQIRIMININ İLDÖNÜMÜ İLƏ ƏLAQƏDAR TƏDBİRLƏR PLANI HAZIRLANMIŞDIR
Planda Xətai rayonunda Xocalı soyqırımı qurbanlarının xatirəsinə ucaldılmış “Vətən harayı” abidəsinin, həmçinin Naftalan şəhərindəki müvafiq abidənin önünə əklil qoyulması, Bakıdakı Şəhidlər xiyabanının ziyarət edilməsi, xarici və ölkə KİV-lərinin nümayəndələri üçün mətbuat konfransının keçirilməsi nəzərdə tutulmuşdur.
Bundan əlavə, şəhər və rayonlarda, müəssisələrdə, ali və orta məktəblərdə xatirə gecələri, sərgilər, şahidlərlə görüşlər keçiriləcək, milli azadlıq uğrunda mübarizəyə həsr olunmuş sənədli və bədii filmlər nümayiş etdiriləcəkdir. Dövlət rəhbərlərinin, Milli Məclisin deputatlarının, ziyalıların iştirakı ilə xocalıların sıx yaşadıqları şəhər və rayonlarda şəhid ailələrinə yardım göstəriləcəkdir. Fevralın 24-də təhsil ocaqlarında ilk dərs Xocalı soyqırımına həsr olunacaq, fevralın 26-da isə bütün respublika ərazisində saat 17-də bu faciə qurbanlarının xatirəsi bir dəqiqəlik sükutla yad ediləcəkdir.
Azərbaycan Respublikasının xarici ölkələrdəki səfirliklərində, nümayəndəliklərində Xocalı soyqırımı ilə bağlı mətbuat konfransları, anma mərasimləri keçiriləcəkdir.
Tədbirlər planında internet şəbəkəsinə Xocalı soyqırımını əks etdirən məlumatların daxil edilməsi, kütləvi informasiya vasitələri ilə əlaqədar bəndlər də vardır.
Bölmənin digər xəbərləri
