XOCAVƏNDLİLƏRİN GƏLƏCƏYƏ İNAMLARI BÖYÜKDÜR
AZƏRTAC-ın müxbiri xəbər verir ki, fevralın 14-də Xocavənd Rayon İcra Hakimiyyətində hesabat yığıncağı keçirilmişdir.
Rayon icra hakimiyyətinin başçısı Eyvaz Hüseynov 2006-cı ildə görülmüş işlər barədə hesabat məruzəsi ilə çıxış etmişdir. 2006-cı ildə Prezident İlham Əliyevin rəhbərliyi ilə ölkəmizin sosial-iqtisadi həyatının bütün sahələrində qazanılan uğurları konkret faktlarla xatırladan məruzəçi, regionların sosial-iqtisadi inkişafı Dövlət Proqramından irəli gələn vəzifələrin icrasının xocavəndlilərin də güzəranının yaxşılaşmasına səbəb olduğunu söyləmişdir.
Bildirilmişdir ki, rayonun 10 mindən çox əhalisi respublikamızın 38 rayonunda müvəqqəti məskunlaşmış, əksəriyyəti isə Beyləqan rayonu yaxınlığındakı Haramı düzünə pənah gətirmişdir. Burada Yeni Xocavənd və Yeni Tuğ qəsəbələri salınmışdır.
Bitkiçilik və heyvandarlıqla məşğul olmaq üçün ayrılmış 17 min 730 hektar torpaq sahəsindən səmərəli istifadə olunur. Qarşıya çıxan çətinliklərə baxmayaraq ötən il ət, süd, yumurta, taxıl və digər məhsulların istehsalı 2005-ci illə müqayisədə xeyli artmışdır.
Xocavəndlilərin məşğulluq probleminin həlli istiqamətində tədbirlər görülmüş, rayonun əmək ehtiyatları öyrənilmiş, işləyən əhalinin siyahısı dəqiqləşdirilmiş, iş axtaran vətəndaşlar qeydiyyata götürülmüşdür. Rayon əhalisinin yığcam məskunlaşdıqları ərazilərdə məcburi köçkünlərin içməli su, elektrik enerjisi ilə təminatının yaxşılaşdırılması üçün tədbirlər görülmüşdür.
Qeyd olunmuşdur ki, ayrı-ayrı bölgələrdə rayonun 21 ümumtəhsil məktəbi fəaliyyət göstərir. Son vaxtlar Qaradağlı, Xocavənd 3 nömrəli, Tuğ, Haxullu kənd məktəblərində əlavə sinif otaqları inşa olunmuş, yeni tədris avadanlığı ilə təchiz edilmişdir.
Gənclər və idman idarəsi rayon gənclərinin və yeniyetmələrin asudə vaxtlarının səmərəli təşkili, onların fiziki hazırlığının yaxşılaşdırılması, hərbi vətənpərvərlik tərbiyəsi, hərbi xidmətdən yayınmanın qarşısının alınması üçün bir sıra maraqlı və yaddaqalan tədbirlər keçirmişdir.
Rayon əhalisinə mərkəzi xəstəxana, 3 feldşer-mama məntəqəsi, 4 həkim ambulatoriyası, 3 kənd sahə xəstəxanası tibbi xidmət göstərir. Səhiyyə Nazirliyi ötən il mərkəzi xəstəxananı təcili tibbi yardım maşını ilə təmin etmişdir.
Hər il olduğu kimi, bu il də məcburi köçkünlərə maddi və mənəvi kömək göstərilmiş, yardımlar edilmişdir. Dövlətqaçqınkomun xətti ilə su nasosları, elektrik transformatorları və naqili alınıb məcburi köçkünlərin istifadəsinə verilmişdir.
Baş nazirin müavini, Dövlətqaçqınkomun sədri Əli Həsənov yığıncaqda çıxış edərək demişdir ki, Prezident İlham Əliyev respublikamızda ən çətin vəziyyətdə yaşayan insanların məhz qaçqın və məcburi köçkünlər olduğundan həm dövlət tərəfindən, həm də qeyri-hökumət təşkilatlarının onlara kömək göstərməsini bir vəzifə kimi qarşıya qoymuşdur. Ulu öndər Heydər Əliyevin təşəbbüsü ilə yaradılan Neft Fondunun ilk vəsaiti də qaçqın və məcburi köçkünlərin yaşayış səviyyəsinin yaxşılaşdırılmasına yönəldilmişdir. Bu il dövlət büdcəsindən məcburi köçkünlərin problemlərinin həlli üçün 100 milyon manat, Dövlət Neft Fondundan isə 124 milyon manat vəsait ayrılması nəzərdə tutulmuşdur.
Məcburi köçkünlər inanırlar ki, dövlətimizin başçısının həyata keçirdiyi uğurlu siyasət nəticəsində torpaqlarımız tezliklə işğaldan azad olunacaq, insanlar doğma yurd-yuvalarına qayıdacaqlar.
Tədbirdə Prezidentin İcra Aparatının məsul işçisi Rövşən Ağayev, Nazirlər Kabinetinin məsul işçisi Qurban Sadıqov, Milli Məclisin deputatı Elman Məmmədov iştirak etmişlər.
Yığıncaqda Prezident İlham Əliyevə müraciət qəbul olunmuşdur.
Bölmənin digər xəbərləri
