Yanvar-may aylarında “Azərsu”nun təqdim etdiyi xidmətlərlə bağlı 58 mindən çox müraciət ünvanlanıb
Bakı, 14 iyun, AZƏRTAC
“Azərsu” ASC-nin Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “ASAN xidmət” və “ASAN Kommunal” mərkəzlərində təmsil olunması istehlakçılara göstərilən müştəri xidmətlərini asanlaşdırır və bu sahədə şəffaflığın artırılmasını təmin edir.
ASC-dən AZƏRTAC-a bildirilib ki, 2022-ci ilin yanvar-may aylarında bu mərkəzlərə “Azərsu” ASC-nin təqdim etdiyi xidmətlərlə bağlı 58 min 197 müraciət olunub. Müraciətlərin 32 min 878-i “ASAN Kommunal”, 25 min 319-u isə “ASAN xidmət” mərkəzlərində qeydə alınıb. Vətəndaşlar xidmət bölmələrinə daha çox texniki şərtin verilməsi, abonent məlumatlarına dəyişikliklərin edilməsi, borclar haqqında məlumatların verilməsi və sair məsələlərlə bağlı müraciətlər edib.
Qeyd edək ki, “ASAN xidmət” mərkəzlərində “Azərsu” ASC-nin müştəri xidmətlərinin göstərilməsinə 2014-cü ilin may ayından başlanılıb. 2017-ci ildən “Azərsu” ASC “ASAN Kommunal” mərkəzlərində də təmsil olunur. Ümumilikdə 2014-cü ildən indiyədək bütün xidmət mərkəzlərinə vətəndaşlar tərəfindən müxtəlif məsələlərlə bağlı 570 minədək müraciət edilib.
Hazırda “Azərsu” ASC-nin xidmətləri Bakı şəhərindəki 1,2,3 saylı “ASAN Kommunal”, 6 saylı “Asan xidmət”, həmçinin regionlarda 15 “ASAN xidmət” mərkəzində təşkil olunub.
Bölmənin digər xəbərləri
