YAP Səbail rayon təşkilatında “Aprel döyüşləri bizim şanlı hərbi qələbəmizdir” mövzusunda videokonfrans keçirilib
Bakı, 6 aprel, AZƏRTAC
YAP Səbail rayon təşkilatında Aprel döyüşlərinin beşinci ildönümünə həsr olunan “Aprel döyüşləri bizim şanlı hərbi qələbəmizdir” mövzusunda videokonfrans keçirilib.
YAP Səbail rayon təşkilatından AZƏRTAC-a bildiriblər ki, Vətən müharibəsinin Səbail rayonundan olan qazilərinin, rayon ictimaiyyəti nümayəndələrinin, ziyalıların, partiya fəallarının və gənclərin qatıldıqları videokonfransda YAP Səbail rayon təşkilatının sədri professor Şəmsəddin Hacıyev, Cəbrayıl rayonu Novruz Aslanov adına Cocuq Mərcanlı kənd tam orta məktəbinin direktoru Zamin Həziyev, Milli Məclis Aparatının Sosial qanunvericilik şöbəsinin müdiri, YAP Səbail rayon 2 №-li ərazi ilk partiya təşkilatının sədri Adil Vəliyev, YAP Veteranlar Şurasının və YAP Səbail rayon təşkilatının İdarə Heyətinin üzvü Adilə Abasova, 6 saylı məktəb-liseyin direktoru Gülşən Orucova, 50 saylı məktəbin direktoru Sədaqət Həsənova, YAP Səbail rayon təşkilatı sədrinin müavini Mehman İsmayılov, Azərbaycan Respublikasının Prezidenti yanında Dövlət İdarəçilik Akademiyasının dekanı, “İdarəedicilər” ərazi ilk partiya təşkilatının sədri professor Elçin Əhmədov, YAP Səbail rayon “Akademik Filarmoniya” (Azərbaycan Dövlət Akademik Filarmoniyası) ərazi ilk partiya təşkilatının sədri Elçin Abbasov və digərləri, həmçinin Vətən müharibəsinin qaziləri çıxış ediblər.
Videokonfransda F.Əmirov adına Azərbaycan Dövlət Mahnı və Rəqs Ansamblının solistlərinin - Əməkdar artistlər Almaz Orucova, Sahib Paşazadə, kamançada Xəyyam Məmmədov və nağarada Emin Cəbrayılovun ifası dinlənilib.
Əvvəlcə 2016-cı il Aprel döyüşlərində, Vətən müharibəsində və Azərbaycanın ərazi bütövlüyü, müstəqilliyi uğrunda şəhid olan qəhrəmanların əziz xatirəsi bir dəqiqəlik sükutla yad olunub.
Azərbaycanın müasir hərb tarixinin ən möhtəşəm səhifələrindən biri olan Aprel döyüşlərinin Vətən müharibəsindəki tarixi Qələbəmizin ilk müjdəçisi olduğunu vurğulayan YAP Səbail rayon təşkilatının sədri professor Şəmsəddin Hacıyev bu döyüşlərdən əvvəl regiondakı geosiyasi vəziyyət, işğalçı Ermənistan tərəfindən Azərbaycana qarşı törədilən hərbi və siyasi təxribatlar, Aprel döyüşlərində erməni miflərinin ifşa olunması, Azərbaycan Ordusunun yüksək peşəkarlığı və şanlı Aprel qələbəsi, işğalçının məruz qaldığı ağır canlı və hərbi texnika itkisi, Azərbaycanın “dörd günlük müharibə”də əldə etdiyi nəticələr, işğaldan azad olunan ərazilər haqqında danışıb. Bildirib ki, Aprel döyüşləri Vətən müharibəsindəki şanlı Qələbənin bünövrəsi idi. Ş.Hacıyev qeyd edib ki, məhz Aprel döyüşlərində Azərbaycan xalqı əzəli düşməni üzərində uzun illərdən sonra böyük qələbə qazanıb, rəşadətli Ordumuz Füzuli, Cəbrayıl və Ağdərə rayonlarının işğal altındakı ərazilərinin 2000 hektardan çox hissəsini azad edib, Talış kəndi ətrafındakı bir çox strateji əhəmiyyətli yüksəkliklərin, Lələtəpənin, Cəbrayılın Cocuq Mərcanlı kəndinin, Ağdərə-Madagiz istiqamətində yolların nəzarətdə saxlanılmasını təmin edərək, düşmən üzərində strateji üstünlük qazanıb. Bundan başqa, döyüşlərdə ermənilərə məxsus 30 tank, 15-dək artilleriya qurğusu və möhkəmləndirilmiş mühəndis qurğuları, həmçinin 320 nəfər canlı qüvvə məhv edilib, 500-dən çox hərbçi yaralanıb.
Vurğulanıb ki, müstəqillik tariximizə qızıl hərflərlə yazılan şanlı Aprel qələbəsi nəticəsində bütün dünya Azərbaycan Ordusunun gücünü görüb. Ordumuzun döyüş qabiliyyəti, ən müasir texniki sistemlərlə təchizatı Azərbaycanın xalqının qələbə ruhunu yüksəldib. 2018-ci il Günnüt zəfəri, 2020-ci il Tovuz döyüşləri Azərbaycan xalqını addım-addım Böyük Qələbəmizə, torpaqlarımızın işğaldan tamamilə azad olunmasına, Vətən müharibəsindəki misilsiz Zəfərimizə yaxınlaşdırıb. Azərbaycan xalqı Vətən uğrunda döyüşən, şəhid, qazi olan İkinci Qarabağ müharibəsi iştirakçılarının xidmətlərini əbədi yaşadacaq, qəhrəman oğullarımızın qanı, canı bahasına işğaldan azad olunan torpaqlarımızın hər qarışını göz bəbəyi kimi qoruyacaqdır.
Səbail rayonundan olan şəhid və qazi ailələrinin Yeni Azərbaycan Partiyası tərəfindən daim xüsusi diqqət mərkəzində saxlanıldığını qeyd edən Ş.Hacıyev bildirib ki, “Şəhid və qazi ailələrinə davamlı qayğı” aksiyası çərçivəsində ərazi ilk partiya təşkilatlarının iştirakı ilə bundan sonra da müxtəlif layihələr icra olunacaq.
Zəfər tariximizin əbədi olmasını arzulayan YAP Səbail rayon “Akademik Filarmoniya” (Azərbaycan Dövlət Akademik Filarmoniyası) ərazi ilk partiya təşkilatının sədri Elçin Abbasov şanlı Aprel döyüşlərinin, Vətən müharibəsinin iştirakçılarının, qazilərimizin Vətən qarşısındakı xidmətlərini yüksək qiymətləndirib. Qeyd olunub, Filarmoniya kollektivinin üzvü, Azərbaycan Dövlət Mahnı və Rəqs Ansamblının rəqqası Firdovsi Eyvazov 44 günlük Vətən müharibəsində döyüş, Zəfər yolu keçərək yaralanıb. Qazinin gündəlik qayğıları Azərbaycan Dövlət Akademik Filarmoniyasının kollektivinin xüsusi diqqəti mərkəzində saxlanılır.
Sonra Respublikamızın Əməkdar artistlərinin ifasında musiqi nömrələri səsləndirilib.
Konfransda çıxış edən natiqlər şanlı Aprel döyüşlərindən, Vətən müharibəsində qələbədən sonra Azərbaycanın ərazi bütövlüyünün bərpa olunmasından böyük həyəcan, sevinc və qürur hissi ilə danışıblar. Çıxışçılar şəhidlərimizin əziz xatirəsini yad edib, qazilərimizə, onların fədakar ailələrinə təşəkkür edib, Azərbaycan Ordusunun möhtəşəm tarixi Zəfərinin və qəhrəman Vətən oğullarının xidmətlərinin əbədiləşdirilməsi, gələcək nəsillərə ötürülməsi üçün müxtəlif təkliflər səsləndiriblər.
Çıxış edən qazilər Azərbaycan xalqının 44 günlük şanlı Zəfərindən fəxarətlə danışıb, şəhid olan döyüş yoldaşlarının əziz xatirələrini ehtiramla yad edib, sağlamlığını Vətən uğrunda qurban verən qazilərimizə şəfalar diləyib, onlara göstərilən diqqət və qayğıya görə minnətdarlıqlarını bildiriblər.
Bölmənin digər xəbərləri
