YAP Səbail rayon təşkilatının yaranmasının 23-cü ildönümü qeyd olunub
Bakı, 19 fevral, AZƏRTAC
Fevralın 19-da Yeni Azərbaycan Partiyası (YAP) Səbail rayon təşkilatının yaranmasının 23-cü ildönümünə həsr olunan tədbir keçirilib.
AZƏRTAC xəbər verir ki, əvvəlcə Yeni Azərbaycan Partiyasının qurucusu, ümummilli lider Heydər Əliyevin xatirəsi bir dəqiqəlik sükutla yad edilib.
YAP Səbail rayon təşkilatının sədri, Milli Məclisin deputatı Şəmsəddin Hacıyev çıxış edərək partiyanın təsis edilməsinin ölkəmizin ictimai-siyasi həyatında mühüm hadisə olduğunu bildirib. Təşkilatın 1993-cü il fevralın 21-də Azərbaycan Dövlət Pedaqoji Universitetinin akt zalına toplaşmış 500-dək şəxsin iştirakı ilə keçirilən təsis konfransında yaradıldığını vurğulayan Ş.Hacıyev qurumun ötən müddətdə uğurla fəaliyyət göstərdiyini, respublikamızın ictimai-siyasi həyatında fəallığı ilə seçildiyini diqqətə çatdırıb. O, təşkilatın uğurlu fəaliyyətində uzun müddət bu quruma sədrlik etmiş mərhum Zahid Qaralovun misilsiz xidmətlərini vurğulayıb.
Prezident İlham Əliyevin rəhbərliyi ilə Azərbaycanın sürətlə inkişaf edərək mühüm nailiyyətlər qazandığını vurğulayan YAP Səbail rayon təşkilatının sədri bu uğurlarda üzvlərinin sayı 700 minə çatan Yeni Azərbaycan Partiyasının mühüm rol oynadığını bildirib. Diqqətə çatdırıb ki, bu gün YAP böyük ictimai-siyasi qüvvə olmaqla yanaşı, regionun ən qüdrətli partiyasıdır. Partiyanın avanqard qüvvələrindən olan YAP Səbail rayon təşkilatının üzvləri də ictimai-siyasi proseslərdə fəal iştirak edirlər.
YAP İdarə Heyətinin üzvü, Milli Məclisin aqrar siyasət komitəsinin sədri Eldar İbrahimov partiyanın yaranma tarixi barədə iştirakçılara ətraflı məlumat verib. Partiyanın qurulmasında ümummilli lider Heydər Əliyevin misilsiz xidmətlərindən söz açan E.İbrahimov Ulu Öndərin təşəbbüsü ilə Naxçıvan Ali Məclisinin ilk sessiyasında Azərbaycan Xalq Cümhuriyyətinin üçrəngli bayrağının dövlət bayrağı kimi qəbul edilməsinin müstəqillik yolunda atılan mühüm addım olduğunu vurğulayıb.
Müstəqilliyin əvvəllərində ölkəmizdə bütün sahələrdə hökm sürən tənəzzüldən danışan komitə sədri bildirib ki, Azərbaycanın xilasını müdrik rəhbərliyə əsaslanan yeni siyasi qüvvənin yaradılmasında görən mütərəqqi ziyalıların imzası ilə “Səs” qəzetində açıq məktub dərc edildi. Sonrakı dövrdə Naxçıvanda YAP təsis edildi və ölkəmizin siyasi həyatında aparıcı qüvvəyə çevrildi. 1993-cü ildə xalqın tələbi ilə ulu öndər Heydər Əliyevin hakimiyyətə qayıdışından sonra demokratik, hüquqi dövlət quruculuğu prosesi başladı. E.İbrahimov bu gün Prezident İlham Əliyevin sədri olduğu YAP-ın dünyanın böyük dövlətlərinin aparıcı siyasi partiyaları ilə fəal əməkdaşlıq etdiyini diqqətə çatdırıb.
YAP İdarə Heyətinin üzvü Nizami Xudiyev, Siyasi Şurasının üzvü Rizvan Vahabov, partiyanın Səbail rayon təşkilatı sədrinin birinci müavini Muxtar Nağıyev və digərləri çıxış edərək bu qurumun tarixindən, uğurlu fəaliyyətindən və qazandığı nailiyyətlərdən danışıblar. Qeyd olunub ki, bu gün YAP Səbail rayon təşkilatı partiyanın avanqard qüvvələrindən biri kimi yüksək fəallığı ilə seçilir.
Çıxışlardan sonra bir qrup fəal partiya üzvünə fəxri fərmanlar təqdim edilib.
Daha sonra YAP Səbail rayon təşkilatının veb-saytının təqdimatı olub, səhifənin funksiyaları barədə ətraflı məlumat verilib.
Tədbirdə, həmçinin 2016-ci ildə təşkilatın fəaliyyət istiqamətləri ətrafında fikir mübadiləsi aparılıb.
Bölmənin digər xəbərləri
