YAP Xətai rayon təşkilatının yaradılmasının 23-cü ildönümü qeyd edilib
Bakı, 11 fevral, AZƏRTAC
Yeni Azərbaycan Partiyası Xətai rayon təşkilatının yaradılmasının 23-cü ildönümü münasibətilə tədbir keçirilib.
Rayon təşkilatının sədri, Milli Məclisin deputatı Hüseynbala Mirələmov bu münasibətlə tədbir iştirakçılarını təbrik edib.
YAP Xətai rayon təşkilatının çətin şəraitdə yarandığını deyən H.Mirələmov ötən dövr ərzində təşkilatın böyük inkişaf yolu keçdiyini vurğulayıb. O qeyd edib ki, ulu öndər Heydər Əliyevin ideyalarına əsaslanan partiyamız Prezident İlham Əliyevin rəhbərliyi ilə böyük uğurlara imza atır. Hazırda rayon təşkilatının 17 mindən çox üzvü var.
Tədbirdə çıxış edən YAP Siyasi Şurasının üzvü, “İki sahil” qəzetinin baş redaktoru Vüqar Rəhimzadə partiyanın nəinki ölkəmizin, ümumilikdə Cənubi Qafqazın ən böyük siyasi qüvvəsi olduğunu bildirib. YAP-ın dünya ölkələrinin nüfuzlu siyasi təşkilatları ilə sıx əməkdaşlıq etdiyini deyən V.Rəhimzadə partiyanın yerli strukturlarının, o cümlədən Xətai rayon təşkilatının uğurla fəaliyyət göstərdiyini vurğulayıb.
Xətai Rayon İcra Hakimiyyətinin başçısı Razim Məmmədov çıxış edərək rayon təşkilatının fəaliyyətini yüksək qiymətləndirib.
Sonda bir qrup partiya fəalına fəxri fərmanlar, YAP sıralarına yeni qoşulmuş şəxslərə üzvlük vəsiqələri təqdim olunub.
Bölmənin digər xəbərləri
