Yaponiya Cənubi Koreyaya təkrar etirazını bildirib
Tokio, 23 dekabr, AZƏRTAC
Yaponiya Müdafiə Nazirliyi hərbi gəminin radar sisteminin patrul təyyarəsinə yönəldilməsinə görə Cənubi Koreyaya təkrar etirazını bildirib.
AZƏRTAC xəbər verir ki, dekabrın 20-də baş vermiş hadisədə Cənubi Koreyaya məxsus esmines və Yaponiya özünümüdafiə qüvvələrinin P-1 patrul təyyarəsi iştirak edib. Hadisə Yapon dənizində, İşikava prefekturasındakı Noto yarımadasının yaxınlığında baş verib. Ertəsi gün Yaponiya hadisə ilə əlaqədar Cənubi Koreyaya etirazını bildirib.
Cənubi Koreya bu etirazı qəbul etməyərək, bəyan edib ki, esmines radardan Şimali Koreyanın yaxınlıqda üzən gəmisini tapmaq üçün istifadə edib.
Buna cavab olaraq Yaponiya Müdafiə Nazirliyi bildirib ki, atəşin idarə olunması üzrə radar sistemi hədəf və onun yerləşdiyi yer barədə dəqiq informasiyanı hücum məqsədilə əldə edir.
Nazirlikdən bildiriblər ki, belə radar geniş ərazidə axtarış aparmaq üçün istifadə oluna bilməz.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
