YAPONİYA HÖKUMƏTİ SABİRABADDA “QUŞ QRİPİ”NƏ QARŞI MÜBARİZƏ LAYİHƏSİNİ REALLAŞDIRMIŞDIR
AZƏRTAC-ın müxbiri xəbər verir ki, oktyabrın 11-də Sabirabadın Zona Veterinar laboratoriyasında Yaponiya hökumətinin "Ot Kökləri və İnsan Təhlükəsizliyi" (OKİT) Qrant Proqramı çərçivəsində həyata keçirilən Sabirabad rayonunda “Quş qripi”nə qarşı mübarizə tədbirlərinin gücləndirilməsi layihəsinin başa çatması münasibətilə açılış mərasimi keçirilmişdir.
Mərasimdə iştirak edən Yaponiyanın respublikamızdakı səfirliyinin müşaviri Hideomi Nakacima bildirmişdir ki, Yaponiya səfirliyi və Sabirabad rayon veterinar laboratoriyası arasında sözügedən layihə üzrə qrant müqaviləsi keçən ilin noyabrında bağlanmışdır. Ümumi dəyəri 89 min 592 ABŞ dolları təşkil edən layihədən 400 min nəfər vətəndaş faydalanacaqdır.
Yaponiyalı diplomat daha sonra göstərmişdir ki, təmsil etdiyi ölkə "OKİT" Qrant Proqramı çərçivəsində Azərbaycanın altı rayonunun (Sabirabad, Lənkəran, Xanlar, Naxçıvan, Xaçmaz və İmişli) veterinar laboratoriyalarını müvafiq avadanlıqla təchiz etmişdir.
Mərasimdə iştirak etmiş Dövlət Baytarlıq Xidməti İdarəsinin rəisi Qədim Məhərrəmov göstərdiyi təmənnasız yardıma görə Yaponiya hökumətinə minnətdarlığını bildirmişdir.
Veterinar laboratoriyanın yeni tikilmiş binasının açılışını bildirən qırmızı lent kəsilmişdir. Tədbir iştirakçıları binada yaradılmış iş şəraiti ilə yaxından tanış olmuşlar.
Bölmənin digər xəbərləri
