Yaponiya tarixində yeni dövrün adını Nazirlər Kabinetinin baş katibi Yoşihide Suqa elan edəcək
Tokio, 28 mart, AZƏRTAC
Yaponiya Nazirlər Kabinetinin baş katibi Yoşihide Suqa yeni İmperatorun taxta çıxması ilə əlaqədar ölkə tarixində yeni dövrün adını gələn həftənin birinci günü elan edəcək.
AZƏRTAC xəbər verir ki, Y.Suqa bunu Baş nazir Şinzo Abenin rəhbərlik etdiyi hökumət yeni dövrün adını təsdiq etdikdən sonra bildirəcək. Bundan sonra Baş nazir Şinzo Abe şərhlə çıxış edəcək.
Qeyd edək ki, Yaponiyada yeni dövrün elan edilməsi ilə bağlı konkret prosedur yoxdur. Bununla yanaşı, hökumətin 1989-cu ildə dövrün dəyişməsi ilə bağlı təcrübədən istifadə etdiyi güman olunur. Həmin vaxt yeni dövrün adını Nazirlər Kabinetinin baş katibi olmuş Keyzo Obuçi elan etmişdi.
Y.Suqa, adətən Nazirlər Kabinetinin adından çıxış edərək hökumətin qəbul etdiyi qərarları elan edir.
Ötən dəfə K.Obuçi, eyni zamanda, həmin vaxt Baş nazir olan Noboru Takeşitanın yeni dövrlə əlaqədar şərhini də oxumuşdu. Bu dəfə isə Ş.Abenin özünün şərhlə çıxış edəcəyi planlaşdırılır. Belə güman olunur ki, bununla Ş.Abe yeni dövrlə bağlı öz ümidlərini də bölüşmək istəyir.
Xatırladaq ki, Yaponiya yeni dövrə mayın 1-də, şahzadə-vəliəhd Naruhito taxta çıxdıqdan sonra qədəm qoyacaq. İmperator Akihito isə aprelin 30-da taxtı tərk edəcək ki, bununla da Heysey dövrü başa çatacaq.
Yeni dövrün adı onun başlanmasına bir ay qalmış elan ediləcək.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
