Yaponiya və Çin Asiyada birgə infrastruktur layihələri həyata keçirəcəklər
Tokio, 11 may, AZƏRTAC
Yaponiyanın Baş naziri Şinzo Abe bəyan edib ki, Asiyada infrastruktur layihələrinə artan marağın fonunda Tokio Çin ilə sıx əməkdaşlıq etmək niyyətindədir.
AZƏRTAC NHK telekanalına istinadla xəbər verir ki, Ş.Abe bu fikri Çinin Baş naziri Li Keçyanın şərəfinə yapon şirkətləri tərəfindən təşkil edilən qəbulda səsləndirib. 2013-cü ildən Çinin Baş naziri olan Li Keçyan Yaponiyaya ilk dəfədir səfərə gəlib.
Ş.Abe deyib ki, Li Keçyan ilə aparılan rəsmi danışıqlar zamanı tərəflər iki ölkənin dövlət və özəl sektorlarının nümayəndələri üçün iqtisadi forumun təşkili barədə razılığa gəliblər. Hər iki dövlət xarici infrastruktur layihələri uğrunda rəqabətdənsə, əməkdaşlıqdan daha çox faydalana bilər.
Li Keçyan isə öz növbəsində yapon şirkətlərini Asiya, Afrika və Avropa regionlarını əhatə edən “Bir kəmər, bir yol” layihəsində fəal iştiraka dəvət edib. Onun fikrincə, Çin və Yaponiya texnoloji innovasiyalar sahəsində də bir-biri üçün faydalı ola bilər.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
