Yaponiyada dünyada ilk dəfə koronavirus xəstəsinə canlı donordan ağciyər köçürülüb
Tokio, 8 aprel, AZƏRTAC
Yaponiyanın Kioto Universiteti xəstəxanasının mütəxəssisləri yeni koronavirusun əmələ gətirdiyi xəstəlikdən əziyyət çəkən ağır xəstəyə canlı donordan ağciyər köçürülməsi əməliyyatını uğurla başa vurublar.
AZƏRTAC xəbər verir ki, bu barədə aprelin 8-də həmin universitet tərəfindən məlumat yayılıb.
Yapon mütəxəssislərin bununla əlaqədar yaydığı məlumatda deyilir: “Dünyada ilk dəfə canlı donordan ağciyərin köçürülməsi həmin orqanı ciddi zərərçəkmiş xəstənin müalicəsində çox vədedici üsul kimi görünür”.
Qeyd edək ki, həmin əməliyyat zamanı, xəstə qadına onun həyat yoldaşının və oğlunun ciyərlərinin parçaları köçürülüb. Bildirilir ki, bu qadın ötən ilin sonlarında koronavirusa yoluxub və onun səhhəti getdikcə pisləşib. Qadın üzərində aparılan əməliyyat təqribən 11 saat çəkib. Hazırda həmin qadının və donorların özlərini yaxşı hiss etdikləri bildirilir.
Qeyd olunur ki, belə əməliyyat dünyada ilk dəfə aparılıb. Buna qədər koronavirus xəstəsi olan şəxslərə ağciyər köçürməsi yalnız beyin koması vəziyyətində olan şəxslərdən köçürülüb.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
