Yaponiyada iki müxalifət partiyası birləşib
Tokio, 26 aprel, AZƏRTAC
Yaponiyada iki müxalifət partiyası vahid siyasi təşkilatda birləşmək barədə razılığa gəlib. Həmin partiyaların sədrləri digər partiyaları da onlardan nümunə götürməyə çağırıblar.
AZƏRTAC xəbər verir ki, aprelin 26-da Xalq Üçün Demokratik Partiya və Liberal Partiya bağlı qapılar arxasında keçirilən yeddi saatlıq müzakirələrdən sonra birləşmək barədə qərar qəbul ediblər.
Görüş iştirakçılarının bildirdiyinə görə, Xalq Üçün Demokratiya Partiyasından olan deputatların əksəriyyəti birləşmə barədə partiyanın sədri Yuiçiro Tamakinin təklifini dəstəkləsə də, bəziləri bunun vaxtının çatmadığını deyib.
Y.Tamaki bildirib ki, birləşmədə məqsəd Baş nazir Şinzo Abenin administrasiyası ilə olan fərqi nümayiş etdirmək və mövcud siyasi qaydaları dəyişməkdir.
Həmin gün Y.Tamaki Liberal Partiyanın sədri İçiro Ozava ilə görüşüb və onlar birləşmə haqqında razılaşmanı birlikdə imzalayıblar.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
