Yaxın altı il ərzində Azərbaycanda 1000-dək beynəlxalq standart tətbiq olunacaq
Bakı, 6 noyabr, AZƏRTACYaxın altı il ərzində Azərbaycan Standartlaşdırma və Sertifikatlaşdırma İnstitutu tərəfindən ölkədə 1000-dək beynəlxalq standartın tətbiqi nəzərdə tutulur. Hazırda sənaye sahəsində 20-yə yaxın beynəlxalq standart qəbul olunub.
AZƏRTAC xəbər verir ki, institutun direktoru Sabiq Abdullayev bu standartların tətbiqinin ilk növbədə respublikada istehsal olunmuş məhsulların xarici bazarlara çıxışını və yerli məhsulların rəqabət qabiliyyətinin artırılmasını təmin etdiyini vurğulayıb.
İnstitut həmçinin Azərbaycan Respublikası Dövlət Neft Şirkəti ilə Bakı şəhəri yaxınlığında tikiləcək Neft-Qaz Emalı və Neft-Kimya Kompleksinin (NQNK) inşası və gələcək fəaliyyətinin təmin edilməsi üzrə standartların hazırlanmasına dair müqavilə imzalayıb. Müqavilədə neft, qaz və kimya sahələri üzrə beynəlxalq və regional standartların aktuallığının araşdırılması kimi məsələlər də əksini tapıb.
Azərbaycan dilinə tərcümələri təmin olunmuş standart layihələrinin linqvistik, orfoqrafik və dövlət standartlaşdırma sisteminə uyğunluğu üzrə ekspertizası aparılacaq. Bundan əlavə, Fövqəladə Hallar Nazirliyi və Sumqayıt Texnologiyalar Parkı MMC ilə də müvafiq sazişlər imzalanıb.
Bölmənin digər xəbərləri
