YENİ AZƏRBAYCAN PARTİYASI SIRALARININ MÜNTƏZƏM ARTMASI XALQIN ONUN RƏHBƏRİNƏ İNAMINDAN İRƏLİ GƏLİR
AZƏRTAC xəbər verir ki, bu fikir iyunun 12-də Yeni Azərbaycan Partiyasının (YAP) mərkəzi qərargahında partiya sıralarına qəbul edilmiş 450 mininci üzvünə vəsiqənin təqdim olunması mərasimində səslənmişdir. YAP sədrinin müavini-icra katibi, Milli Məclisin deputatı Əli Əhmədov bildirmişdir ki, YAP nəinki ölkəmizin, eyni zamanda, bölgənin ən qüdrətli, güclü və kütləvi siyasi təşkilatı kimi geniş ümumxalq etimadı qazandığını təsdiq edən göstəricilərə malikdir. Üzvlərinin sayına görə də lider olan partiyanın sıralarına bu ilin beş ayında 16 mindən çox yeni üzv qəbul olunmuşdur.
O demişdir ki, vətənini, dövlətini sevən 450 min vətəndaşın sıx birləşdiyi YAP bu gün ümummilli lider Heydər Əliyevin ideyalarının daşıyıcısı olmaqla, ölkənin ictimai-siyasi həyatında alternativsiz söz sahibinə çevrilmişdir. Ölkəmizdə bir neçə gün sonra ulu öndər Heydər Əliyevin hakimiyyətə qayıdışının 15 illiyinin təntənəli şəkildə qeyd ediləcəyini xatırladan Əli Əhmədov məhz bu tarixi qayıdış nəticəsində Azərbaycanın xaosdan, özbaşınalıqdan və vətəndaş müharibəsindən qurtulduğunu, iqtisadi yüksəliş və tərəqqi mərhələsinə qədəm qoyduğunu bildirmişdir.
Vurğulanmışdır ki, YAP üzvlərinin sayının 450 minə çatması xüsusilə, prezident seçkiləri ərəfəsində ölkənin həyatında çox mühüm siyasi əhəmiyyət daşıyacaq qədər önəmlidir. Bu faktın özü də qarşıdan gələn prezident seçkilərində Yeni Azərbaycan Partiyasının namizədi İlham Əliyevin alternativsiz olduğunu bir daha təsdiqləyir.
YAP sıralarına qoşulan hər bir vətəndaş, eyni zamanda, seçici kimi qarşıdan gələn prezident seçkilərində artıq öz seçimini etmişdir. YAP üzvlərinin sayının artımı ilk növbədə, partiyanın banisi və qurucusu ümummilli lider Heydər Əliyevin ideyalarına və bu siyasi kursun layiqli davamçısı, Azərbaycan Prezidenti və YAP-ın sədri İlham Əliyevə ümumxalq etimadının parlaq nümunəsidir.
Əli Əhmədov demişdir ki, YAP-a getdikcə marağın daha çox yaranmasını şərtləndirən ən başlıca amillərdən biri Prezident İlham Əliyevin davam etdirdiyi siyasi kursun uğurlu və məntiqi nəticələri, Azərbaycanın nail olduğu yüksək iqtisadi yüksəlişdir. YAP sıralarına xüsusilə gənclərin axınının güclənməsi isə Prezident İlham Əliyevin rəhbərliyi ilə həyata keçirilən siyasi kursa və iqtisadi islahatlara gəncliyin inamı və dəstəyinin bariz nümayişi kimi dəyərləndirilməlidir.
YAP-ın 450 mininci üzvü, Azərbaycan Müəllimlər İnstitunun I kurs tələbəsi Şahanə Məmmədcanova ümummilli lider Heydər Əliyevin yaradıcısı olduğu, vətənimizin müstəqillik tarixində böyük rol oynamış bir partiyanın üzvü olmasından şərəf duyduğunu bildirmişdir. O qeyd etmişdir ki, bu gün Prezident İlham Əliyevin rəhbərliyi altında ulu öndərin ideyalarının yaşadılması, dövlətin gənclərə göstərdiyi diqqət və qayğı onları daha fəal olmağa, ictimai həyatda əzmlə çalışmağa ruhlandırır.
YAP sədrinin müavini Əli Əhmədov partiyanın 450 mininci üzvlük vəsiqəsini Şahanə Məmmədcanova verərək, onu təbrik etmişdir.
Tədbirdə YAP icra katibinin müavinləri, Milli Məclisin deputatları Siyavuş Novruzov və Mübariz Qurbanlı iştirak etmişlər.
Bölmənin digər xəbərləri
