Yeniyetmə və gənc güləşçilərin Avropa çempionatı ləğv olunub
Bakı, 10 avqust, AZƏRTAC
Dünya Güləş Birliyinin (UWW) İcraiyyə Komitəsinin virtual iclası keçirilib.
AZƏRTAC Azərbaycan Güləş Federasiyasına istinadla xəbər verir ki, iclasda ilin sonunadək keçirilməsi nəzərdə tutulan bəzi yarışlarla bağlı qərar qəbul edilib. Belə ki, COVID-19 pandemiyasının davam etməsi səbəbindən İcraiyyə Komitəsi səsvermə yolu ilə sentyabr-oktyabr aylarında keçirilməsi planlaşdırılan bütün beynəlxalq turnirlərin, o cümlədən yeniyetmələr və gənclər arasında Avropa çempionatlarının ləğv edilməsini qərara alıb.
Ötən ay açıqlanan təqvimə əsasən, oktyabrın 5-dən 11-dək Polşada yeniyetmələrin, həmin ayın 19-dan 25-dək isə Şimali Makedoniyada gənclərin Avropa çempionatının keçirilməsi nəzərdə tutulmuşdu.
UWW-nin prezidenti Nenad Laloviç qəbul edilmiş bu qərarları belə şərh edib: “Biz dünya miqyasında pandemiya ilə bağlı görülən tədbirləri izləməyə davam edəcəyik. İdmançılarımızın təhlükəsizliyinə və sağlamlığına qayğı göstərmək üçün məsuliyyət daşıyırıq. Uğurla rəqabət apara biləcəyimiz zamanda yenidən güləşməyə davam edəcəyik".
Qeyd edək ki, İcraiyyə Komitəsi gələn ay növbəti iclasını keçirəcək və bu ilin yarış təqvimini bir daha müzakirə edəcək.
Bölmənin digər xəbərləri
