Yevgeni Mixaylov: Azərbaycan dünyada sülhsevər ölkə imici qazanıb
Tbilisi, 4 noyabr, AZƏRTAC
Bu gün dünyanın bir çox ölkəsində, eləcə də Cənubi Qafqaz ölkələrində regional münaqişələr var. Bu münaqişələrin həllində dövlət başçılarının qətiyyətli addımı ən vacib şərtdir.
AZƏRTAC xəbər verir ki, bu sözləri jurnalistlərə müsahibəsində Rusiyanın tanınmış eksperti Yevgeni Mixaylov söyləyib.
Ekspert deyib: “Biz Dağlıq Qarabağ münaqişəsinin həllində Azərbaycan Prezidenti İlham Əliyevin qətiyyətli mövqeyinin şahidi olduq. İlham Əliyev praqmatik siyasətçidir və çox düzgün xarici siyasət yürüdür. Amma təəssüf ki, digər münaqişə tərəfindən biz bu addımı görə bilmirik. Ona görə də münaqişənin həlli yubanır. Əgər Ermənistan rəhbərliyi də təsir altından çıxıb qarşılıqlı olaraq qətiyyətli addım ata bilsəydi problem həllini tapardı”.
Ekspertin sözlərinə görə, Azərbaycan dövlətinin başçısının düşünülmüş, uzaqgörən siyasəti xalqın da nüfuzunun artmasına səbəb olub. Bu gün Azərbaycan xalqı zorla münaqişəyə cəlb olunsa da, dünyada ən sülhsevər xalq imici qazanıb.
Rusiyalı ekspert onu da vurğulayıb ki, regional münaqişələrin həllində hərbçilərin rolu nəzərə alınmalıdır. Bəzən hərbçilər müəyyən səbəblər üzündən münaqişələrin həllində maraqlı olmurlar. “Hərbçilər münaqişələrin tez bir zamanda həllində və ya uzanmasında vacib rol oynayırlar. Ona görə də onların rolu nəzərə alınmalıdır”, - deyə Mixaylov vurğulayıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
