Pekin, 3 noyabr, AZƏRTAC

Koreya Xalq Demokratik Respublikasının (KXDR) noyabrın 3-də buraxdığı güman olunan “Hwasong-17” qitələrarası ballistik raketi böyük ehtimalla uğursuzluğa düçar olub.

AZƏRTAC xəbər verir ki, bu barədə Yonhap agentliyi Cənubi Koreya hərbçilərinə istinadla xəbər yayıb. Bildirilir ki, paytaxt Pxenyanın tabeliyindəki Sunan rayonundan yerli vaxtla səhər saat 7:40-da buraxılan raket maksimum 760 kilometr yüksəklikdə 1920 kilometr məsafə qət edib. Cənubi Koreya hərbçiləri güman edir ki, raketin uçuşu normal olmayıb.

Qeyd edək ki, Cənubi Koreya silahlı qüvvələrinin birləşmiş qərargahı KXDR-in noyabrın 3-də Yapon dənizi istiqamətində bir qitələrarası, 2 qısamənzilli ballistik raket buraxması barədə məlumat yayıb. Ümumiyyətlə, Şimali Koreya sentyabrın son günlərindən bəri bir neçə dəfə müxtəlif tipli raket buraxılışı həyata keçirib. Noyabrın 2-də isə KXDR Sarı və Yapon dənizləri istiqamətində üçü qısamənzilli ballistik raket olmaqla 10 müxtəlif raket buraxılıb. Qısamənzilli raketlərdən biri Yapon dənizində de-fakto sərhəd xəttinin 26 kilometr cənub hissəsinə düşüb. Bu, Şimali Koreyanın 1950-1953-cü illər Koreya müharibəsindən sonra de-fakto sərhəd xəttinin cənubuna atdığı ilk raketdir. Cənubi Koreyanın qırıcı təyyarələri cavab məqsədilə Yapon dənizində sərhəd xəttin şimal hissəsinə 3 ədəd hava-yer raketi atıb. Bunun ardınca Şimali Koreya Sarı və Yapon dənizləri istiqamətində daha 6 raket atıb, bundan başqa, iki Koreya arasındakı quru ərazidəki bufer zonaya yüzlərlə artilleriya atəşi həyata keçirib.

Şimali Koreyada sonuncu raket buraxılışları ABŞ və Cənubi Koreya hərbi hava qüvvələrinin oktyabrın 31-də başlayan və beş ildən sonra ilk böyük birgə təlimi dövrünə təsadüf edir. Seul və Vaşinqton KXDR-in son iki günün raket buraxılışları səbəbindən artan təhlükəsizlik böhranı fonunda noyabrın 4-də başa çatmalı olan təlimlərin müddətini uzatmaq barədə qərar qəbul edib. Təlimlərə, ümumilikdə, 240-a yaxın təyyarə cəlb olunub.

Şahin Cəfərov

AZƏRTAC-ın xüsusi müxbiri

Pekin